नंदुरबार l प्रतिनिधी-
नंदुरबार येथील रवि किरण लॅब जवळ असलेल्या गार्डनमध्ये हर्ष महेंद्र जाधव ,केतन संजय माळी व वीरेंद्र रवींद्र सोनवणे हे बसलेले असतांना आरोपी नितीन माळी, पवन माळी, जयेश कोळी हे त्या ठिकाणी आले व त्यांनी गार्डन मध्ये बसलेल्या तिघांचा फोटो काढला.यासंबंधी फिर्यादी यांनी जाब विचारला असता राग येऊन वरील आरोपींनी व त्यांच्यासोबत दहा ते पंधरा अनोळखी व्यक्तींनी मिळून हर्ष महेंद्र जाधव यांना जबर मारहाण केली आहे.
याबाबत पोलीस सूत्रांकडून प्राप्त माहितीनुसार दि. ११ डिसेंबर २०२३ रोजी दुपारी ठीक ३ वाजून ३० मिनिटांनी नंदुरबार शहरातील रविकिरण लॅब जवळ असलेल्या भवनांच्या गार्डन मधील सार्वजनिक जागी हर्ष महेंद्र जाधव वय १४ वर्ष, व्यवसाय शिक्षण राहणार स्नेहल पार्क प्लॉट नंबर १६ ब दंडपानेश्वर मंदिरामागे दुधाळे शिवार तालुका जिल्हा नंदुरबार व केतन संजय माळी त्याचबरोबर वीरेंद्र रवींद्र सोनवणे हे बसलेले होते.
त्याचवेळी नितीन माळी, पवन माळी, जयेश कोळी व त्यांच्यासोबत दहा ते पंधरा अनोळखी व्यक्ती हे त्या ठिकाणी आले व त्यांनी संबंधित फिर्यादींचा त्या ठिकाणी फोटो काढला या फोटोचा फिर्यादींनी जाब विचारला असता राग येऊन आरोपींनी त्यांना त्या ठिकाणी फायटर व बॅटने मारहाण करून दुखापत केली व जीवे ठार मारण्याची धमकी दिली.
हर्ष महेंद्र जाधव, केतन संजय माळी व वीरेंद्र रवींद्र सोनवणे यांना गंभीर दुखापत झाली फिर्यादींनी औषधोपचार केल्यानंतर १२ डिसेंम्बर २०२३ रोजी उशिराने नंदुरबार शहर पोलीस स्टेशन येथे यासंदर्भात गुन्हा दाखल केला असून नंदुरबार शहर या ठिकाणी भादवी कलम १४३, १४७, १४८, १४९, ३२४, ३२३,५०४, ५०६ प्रमाणे गुन्हा नोंद करण्यात आला आहे. यासंबंधीचा पुढील तपास पोलीस निरीक्षक यांच्या आदेशान्वये सहाय्यक पोलीस निरीक्षक जितेंद्र जाधव हे करीत आहेत.
