नंदूरबार l प्रतिनिधी
धडगाव-वडफळ्या येथे खर्डी येथील महिलेचा खून प्रकरणी धडगाव पोलिसांनी दोन जणांना अटक केली आहे.
याबाबत अधिक माहिती अशी की, धडगाव तालुक्यातील खर्डी येथील दमणीबाई आमशा पावरा (वय ५०) या गेल्या दहा वर्षापासून मनोरुग्ण स्थितीमध्ये होत्या. गेल्या दोन वर्षापासून त्या धडगाव शहरात फिरत होत्या. दरम्यान, २६ रोजी सकाळी दमणीबाई मरण पावल्याचे त्यांचा मुलगा गुणाजी पावरा यास समजले. त्याने धडगाव-वडफळ्या येथे येऊन पाहिले असता दमणीबाई पावरा एका पत्र्याच्या शेडमध्ये मरण पावल्याचे दिसून आले.
त्यांच्या डोक्याच्या मागील बाजूस तसेत कपाळावर जखमा असल्याने त्यांचा खून झाल्याचा संशय होता. त्यानुसार गुणाजी पावरा यांच्या फिर्यादीवरुन धडगाव पोलिसात खूनाचा गुन्हा दाखल करण्यात आला. याप्रकरणी पोलिस अधिक्षक पी.आर.पाटील, अपर पोलिस अधिक्षक निलेश तांबे, उपविभागीय पोलिस अधिकारी दत्ता पवार, स्थानिक गुन्हा शाखेचे पोलिस निरीक्षक किरण खेडकर यांच्या मार्गदर्शनाखाली पोलिस निरीक्षक आय.एन.पठाण यांच्यासह पथकाने तपास गतिमान केला.
काल दि.२९ रोजी याप्रकरणी पंकज चंदू पराडके (वय १८, रा.जुने धडगाव) व रोशन कुवरसिंग पावरा (वय २५, रा.नगाव ता.धुळे ह.मु.रोषमाळ बु. ता.धडगाव) यांनी महिलेचा खून केल्याच्या संशयावरुन दोघांना अटक करण्यात आली आहे. पुढील तपास पोलिस निरीक्षक आय.एन.पठाण करीत आहेत.
