नंदूरबार l प्रतिनिधी
महाराष्ट्रातून गुजरात राज्यात ट्रक जाऊ देण्यासाठी अक्कलकुवा तालुक्यातील गव्हाली चेक पोस्ट वर 4 हजाराची लाच स्वीकारणाऱ्या आर टी. ओ. विभागाच्या मोटर वाहन निरीक्षक व सहाय्यक रोखपाल यांना शहादा न्यायालयाने दोन वर्ष कैदेची शिक्षा व 5 हजाराचा दंड ठोठावला आहे.
याबाबत अधिक माहिती अशी की, सूर्यभान रेवजी झोडगे, तत्कालीन मोटर वाहन निरीक्षक, वेलजी नहाडिया मावची, सहाय्यक रोखपाल . दोन्ही नेमणूक , उप प्रादेशिक परिवहन अधिकारी कार्यालय, नंदुरबार हे २४ फेब्रुवारी २०१२ रोजी गव्हाली चेक पोस्ट ता. अक्कलकुवा येथे कर्तव्यावर होते. यावेळी मूळ तक्रारदार कंटेनर/ ट्रक चालक हे पुणे येथून त्यांच्या कंटेनरमध्ये माल भरून गुजरात राज्यात जात होते. २४ फेब्रुवारी २०१२ रोजी मूळ तक्रारदार हे गव्हाली चेक पोस्ट ता. अक्कलकुवा येथे आले असता मूळ तक्रारदार कंटेनर /ट्रक चालक यांच्याकडून त्यांची गाडी गव्हाली चेक पोस्ट मार्गे गुजरात राज्यात जाऊ देण्यासाठी ४ हजाराची लाच एन्ट्रीच्या स्वरूपात मागणी करुन ४ हजार रुपये लाच पंचां समक्ष स्वीकारली.
याबाबतच्या यशस्वी सापळा कारवाईनंतर अक्कलकुवा पोलीस ठाण्यात सूर्यभान रेवजी झोडगे व वेलजी नहाडिया मावची यांच्या विरुद्ध भ्रष्टाचार प्रतिबंध अधिनियम कलम ७,१२,१३(१)(ई)(ड),१३(२) अन्वये गुन्हा दाखल होता. नमूद गुन्हयाच्या तपासा अंती दोष सिद्ध झाल्याने जिल्हा न्यायाधीश तथा अतिरिक्त सत्र न्यायाधीश, शहादा सी.एस.दातीर यांनी सूर्यभान रेवजी झोडगे व वेलजी नहाडिया मावची या दोघांना भ्रष्टाचार प्रतिबंध अधिनियम कलम ७ अन्वये प्रत्येकी १ वर्ष कैदेची शिक्षा व ५ हजार दंड, कलम १३ (ड) अन्वये प्रत्येकी २ वर्ष कैदेची शिक्षा व ५ हजार रुपये दंडाची शिक्षा सुनावली आहे.
तपास अधिकारी म्हणून तत्कालीन पोलीस उप अधीक्षक, लाप्रवि नंदुरबार ए जी वडनेरे यांनी तर सरकारी वकील म्हणून स्वर्णसिंह गिरासे यांनी काम पाहिले.पैरवी अधिकारी म्हणून पोलीस उप अधीक्षक, लाप्रवि , नंदुरबार राकेश आ. चौधरी, पोलीस निरीक्षक, लाप्रवि, नंदुरबार समाधान म. वाघ, पोलीस हवालदार अमोल मराठे यांनी काम पाहिले.
