नंदुरबार l प्रतिनिधी
शहरातील अंधारे चौकातील रस्ता दुभाजकाजवळ अक्षय तृतीयेला वाहूतूकीचे नियंत्रीत करणाऱ्या महिला पोलिस कर्मचाऱ्यास धक्काबुक्की करीत मारहाण केल्याप्रकरणी त्या दोघा भावांविरुध्द नंदुरबार शहर पोलिस ठाण्यात गुन्हा दाखल करण्यात आला आहे.
याबाबत पोलीस सूत्रांनी दिलेल्या माहितीनुसार, दि.२२ रोजी अक्षय तृतीयेला दुपारी १ वाजेच्या सुमारास एक महिला पोलिस कर्मचारी नंदुरबार शहरातील अंधारे चौक परिसरात वाहतूक नियंत्रणाचे काम करीत होत्या. यावेळी सरोज परवेज खान याने त्याच्या सहकाऱ्यांसह शासकीय कर्तव्य बजावणाऱ्या महिला पोलिस कर्मचाऱ्याजवळ जाऊन अश्लिल शिवीगाळ केली. तसेच सदर महिला पोलिस कर्मचाऱ्याची कॉलर ओढून हाताबुक्यांनी मारहाण केली.
या मारहाणीत सदर महिला कर्मचाऱ्याच्या खांदे, डोके व पोटाला दुखापत झाली आहे. यादरम्यान सरोज खान याचा मोठा भाऊ सरजील परवेज खान याने देखील महिला पोलिस कर्मचाऱ्याला धक्काबुक्की केली. यादरम्यान घटनास्थळी असलेल्या नागरिकांनी दोघा भावांना मारहाण केल्यानंतर दोघांनी दुचाकीवरुन पळ काढला.
मात्र यावेळी दोघांनी सदर महिला पोलिस कर्मचाऱ्याला जिवेठार मारण्याची धमकी दिली आहे. या घटनेचा व्हिडीओ शनिवार दिवसभर सोशल मिडीयावर व्हायरल झाला होता. याप्रकरणी रात्री उशिराने नंदुरबार शहर पोलिस ठाण्यात पिडीत महिला पोलिस कर्मचाऱ्याच्या फिर्यादीवरुन संशयित सरोज परवेज खान व सरजील परवेज खान या दोघांविरोधात शासकीय कामात अडथळा आणल्याप्रकरणी भादंवि कलम ३५३, ३५४, ५०९, ५०४, ५०६, ३४ प्रमाणे गुन्हा दाखल करण्यात आला आहे. पुढील तपास महिला सहाय्यक पोलिस निरीक्षक नंदा पाटील करीत आहेत.
