नंदुरबार l प्रतिनिधी
प्रतिवर्षी तिथीनुसार अक्षय तृतीयेला क्रांतीसुर्य, थोर समाज सुधारक, जगतज्योती, महात्मा बसेश्वर महाराज यांची जयंती असतेे. अनेक वर्षापासून मंत्रालयासह राज्यात सर्वत्र महात्मा बसवेश्वर जयंती साजरी होत आहे.त्यानुसार नंदुरबार जिल्ह्यातील शासकीय व निमशासकीय कार्यालयांमध्ये देखील महात्मा बसवेश्वर यांच्या जयंतीनिमित्त प्रतिमापूजन आणि सामाजिक उपक्रम व्हावेत अशी मागणी महाराष्ट्र बसव परिषदेतर्फे करण्यात आली आहे.
यासंदर्भात महाराष्ट्र बसव परिषदेचे नंदुरबार जिल्हाध्यक्ष महादू हिरणवाळे यांनी जिल्हाधिकारी मनीषा खत्री यांना दिलेल्या निवेदनात म्हटले आहे की, थोर समाज सुधारक, महात्मा बसवेश्वर महाराज यांची जयंती यंदा शनिवार दि. 22 एप्रिल 2023 रोजी अक्षय तृतीयेला आहे.यापूर्वी जिल्हा प्रशासनाला सन 2009 मध्ये महाराष्ट्र बसव परिषद नंदुरबार जिल्हा शाखेतर्फे पत्र देण्यात आले होते. त्यानुसार तत्कालीन जिल्हाधिकारी सौरभ राव यांनी प्रशासनाला आदेश देऊन जयंती उत्सवाचे आयोजन केले होते. त्याप्रमाणे जिल्हाधिकारी कार्यालय वगळता इतर कुठल्याही शासकीय, निमशासकीय कार्यालयात महात्मा बसवेश्वर जयंती निमित्त प्रतिमापूजन होत नसल्याचे दिसून येत आहे. मंत्रालयासह राज्यातील शासकीय, निमशासकीय कार्यालयात जगतज्योती महात्मा बसवेश्वर जयंती निमित्त प्रतिमा पूजन करण्याचे अध्यादेश शासनाने यापूर्वीच काढले आहेत.
त्यानुसार विभागीय आयुक्त, जिल्हाधिकारी यांनी त्यांच्या विभागातील सर्वच कार्यालयात सदर कार्यक्रमा आयोजित करण्याबाबत आवश्यक सूचना करून अंमलबजावणी बाबत योग्य ती कार्यवाही करण्याच्या सूचना राज्य शासनातर्फे परिपत्रकाद्वारे देण्यात आलेल्या आहेत. लिंगायत धर्माचे संस्थापक, क्रांतीसुर्य, थोर समाज सुधारक, महात्मा बसवेश्वर यांच्या जयंतीनिमित्त नंदुरबार जिल्ह्यातील सर्व शासकीय व निमशासकीय कार्यालयांमध्ये अक्षय तृतीयेला तिथीनुसार प्रतिमा पूजन करण्यात यावे अशी मागणी महाराष्ट्र बसव परिषदेचे नंदुरबार जिल्हाध्यक्ष महादू विठ्ठल हिरणवाळे व पदाधिकारी यांनी केले आहे.
