नंदुरबार l प्रतिनिधी
शहादा-खेतिया रस्त्यावरील सुलतानपूर फाट्याजवळ एस.टी.बसने धडक दिल्याने दुचाकीस्वाराचा मृत्यू झाला तर एक जण जखमी झाल्याची घटना घडली. याप्रकरणी मध्यप्रदेश परिवहन मंडळाच्या चालकाविरोधात गुन्हा दाखल करण्यात आला आहे.
सेंधवा येथील राकेश तुकाराम बडोले (वय २५) हे दुचाकीने (क्र.एम.पी.४६ एम.टी. ७१६४) त्यांचा मित्र विजय विक्रम चव्हाण (वय २४) यांना बसवून शहादा-खेतिया रस्त्याने जात होते. यावेळी मध्यप्रदेश परिवहन मंडळाच्या एस.टी. बस चालकाने त्याच्या ताब्यातील एस.टी.बस (क्र.एम.एच.४६ पी २१५६) रस्त्याच्या परिस्थितीकडे दुर्लक्ष करुन भरधाव वेगात बस चालवून सुलतानपूर फाट्याजवळ मागून दुचाकीला धडक दिल्याने अपघात घडला.
घडलेल्या अपघातात राकेश बडोले यांना गंभीर दुखापत झाल्याने त्यांचा मृत्यू झाला. तर त्यांच्या मित्रही जखमी झाला आहे. अपघातात दुचाकीचेही नुकसान झाले. अपघातानंतर एस.टी.बसचालक घटनास्थळावरुन पसार झाला. याबाबत तुकाराम मन्या बडोले यांच्या फिर्यादीवरुन म्हसावद पोलिस ठाण्यात बस चालकाविरोधात भादंवि कलम ३०४ (अ), २७९, ३३७, ३३८, ४२७ सह मोटार वाहन कायदा कलम १३४, १८६, १८४ प्रमाणे गुन्हा दाखल करण्यात आला आहे. पुढील तपास पोहेकॉ.जितेंद्र पाडवी करीत आहेत.
