नंदुरबार l प्रतिनिधी
नंदूरबार शहरातील बायपास रस्त्यावर असलेल्या कल्याणेश्वर मंदीराजवळील बोअरवेल करणाऱ्या भरधाव ट्रकने दुचाकीला धडक दिल्याने घडलेल्या अपघातात ट्रकचे टायर दुचाकीसह तरुणाच्या अंगावरुन गेल्याने उपचारा दरम्यान तरुणाचा मृत्यू झाल्याची घटना घडली तर अपघातात महिलेसह बालक जखमी झाला आहे. याप्रकरणी पोलीसांत ट्रक चालकाविरुद्ध गुन्हा दाखल करण्यात आला आहे.
याबाबत अधिक माहिती अशी की, साक्री तालुक्यातील एैचाळे येथील रेखाबाई मांगीलाल भोये (वय २७) या पती मांगीलाल शिवलाल भोये (वय ४०) व मुलगा रुद्र (वय १० महिने) हे काल सकाळी १०.१५ वाजेच्या सुमारास नंदुरबार येथील कोकणीहिल येथे बचतगटाच्या कामानिमित्त जात असताना शहरातील धुळे चौफुलीकडून कोकणीहिलकडे जात असतांना कल्याणेश्वर मंदिरासमोरील पुलाजवळ आले असता त्यांच्या मागून येणाऱ्या बोअरवेलच्या ट्रकवरील (क्र.के.ए.०१ एमएन २१२२) चालक नागराजन करपिया वेल्लालर (रा.अरंतागी जि.उदुपोट्टई, तामिळनाडू) याने रस्त्याचा व पुलाचा अंदाज न घेता भरधाव वेगात वाहन चालविले. ओव्हरटेक करण्याचा प्रयत्न करतांना त्याने दुचाकीला धडक दिल्याने अपघात घडला.
अपघातात रेखाबाई भोये व त्यांचा मुलगा रुद्र असे रस्त्याच्या कडेला फेकले गेले. तर मांगीलाल भोये रस्त्यावरच पडल्याने ट्रकचे मधले चाक त्यांच्या अंगावरुन व दुचाकीवरुन चालून गेले. यात मांगीलाल भोये यांच्या कंबरेला, उजव्या पायाच्या मांंडीवर व पंजाला गंभीर दुखापत झाली. अपघातानंतर घटनास्थळी मोठी गर्दी झाली होती. दरम्यान, पोलिस निरीक्षक अर्जुन पटले याच रस्त्याने पोलिस मुख्यालयाकडे जात असतांना त्यांनी घटनास्थळी थांबून जखमींना रुग्णालयात नेण्यासाठी मदत केली.
मांगीलाल भोये यांना रुग्णालयात उपचारादरम्यान मृत्यू झाला. याप्रकरणी रेखाबाई भोये यांच्या फिर्यादीवरुन ट्रकचालक नागराजन करपिया वेल्लालर रा.अरंतागी जि.उदुपोट्टई, तामिळनाडू याच्याविरोधात भादंवि कलम ३०४ (अ), २७९, ३३७, ४२७ सह मोटार वाहन कायदा कलम १८४ प्रमाणे गुन्हा दाखल करण्यात आला आहे.याप्रकरणी पुढील तपास सहाय्यक पोलिस निरीक्षक नंदा पाटील करीत आहेत.
