अक्कलकुवा l प्रतिनिधी
अक्कलकुवा पोलीस ठाण्यात नवनियुक्त पोलीस निरीक्षक यांनी अश्लील भाषा वापरल्यामुळे त्यांच्यावर कायदेशीर कारवाई करण्यात येऊन त्यांना त्वरित निलंबित करावे या मागणीसाठी संध्याकाळी पोलीस ठाण्यासमोर सायंकाळी साडेपाच वाजेच्या सुमारास रास्ता रोको आंदोलन सुरू करण्यात आले.
याबाबत सविस्तर वृत्त असे की अक्कलकुवा तालुक्यातील एका गावातील तरुणीला दि. 14 फेब्रुवारी रोजी विशिष्ट समाजातील एका तरुणाने पळवून नेले होते याबाबत तरुणीच्या कुटुंबीयांनी मुलीला फुस लावुन पळविल्याचा आरोप केला होता. मात्र अक्कलकुवा पोलिसांनी हरविल्याची नोंद केली होती. या तरुणीच्या पोलिसांनी तात्काळ शोध लावून सुपूर्त करावे अशी मागणी केली होती याबाबत रास्ता रोको आंदोलनाचा इशारा दिला होता.मात्र पोलिसांनी तात्काळ तपास करुन मुलीला ताब्यात देण्याचे आश्वासन दिले होते.म्हणुन तूर्तास आंदोलन स्थगित करण्यात आले. तपासाची गती वाढवून मुलीचा तपास लावून आज दि. 26 रोजी मुलीला कुटुंबीयांच्या सुपूर्त करण्यासाठी नंदुरबार येथे बोलाविण्यात आले होते. मात्र मुलीचे कुटुंबीय तसेच गावचे सरपंच व प्रतिष्ठितांनी मुलीला अक्कलकुवा येथील पोलीस ठाण्यामार्फत पालकांना का सुपूर्त करत नाहीत असा प्रश्न उपस्थित केला.
यावेळी अक्कलकुवा पोलीस ठाण्यात नवीनच पदभार स्वीकारलेल्या पोलीस निरीक्षक दीपक बुधवंत यांनी अश्लील शब्द वापरला. त्यामुळे ग्रामस्थांनी याबाबत निषेध व्यक्त करीत या असभ्य पोलीस अधिकाऱ्यावर कारवाई करून त्यांच्यावर गुन्हा नोंदविण्यात येऊन त्यांना निलंबित करावे.या मागणीसाठी शेवाळी नेत्रंग महामार्गावर संध्याकाळी साडेपाच वाजेच्या सुमारास रास्ता रोको आंदोलन करण्यात आले. सुमारे अडीच तास चाललेल्या या रास्ता रोको आंदोलना दरम्यान उप विभागीय पोलीस अधिकारी संभाजी सावंत यांनी संबंधित अधिकाऱ्यावर कायदेशीर कारवाई करण्यात येईल याबाबत वरिष्ठांना अहवाल सादर करून योग्य ती कारवाई करतील व यापुढे पोलीस अधिकारी व कर्मचाऱ्यांकडून प्रत्येकाला चांगली वागणूक दिली जाईल असे आश्वासन दिल्याने रात्री आठ वाजेच्या सुमारास आंदोलन स्थगित करण्यात आले.
यावेळी आमदार आमश्या पाडवी, आदिवासी एकता परिषदेचे नागेश पाडवी आदिवासी महासंघाचे किसन महाराज ,हिरामण पाडवी, जे .डी. पाडवी, पंचायत समिती सदस्य जेकमसिंग पाडवी , सरपंच वसंत वसावे ,कान्हा नाईक ,विनोद वळवी, कुवरसिंग वळवी, भूपेंद्र पाडवी , मंगलसिंग वळवी, पृथ्वीसिंग पाडवी ,केतन पाडवी, राजेंद्र वसावे, सुनील राव ,अश्विन तडवी ,विकेश पाडवी, राजू तडवी ,नटवर पाडवी, ॲड .रुपसिंग वसावे आदिंसह विविध आदिवासी संघटनांचे पदाधिकारी कार्यकर्ते ग्रामस्थ तसेच पीडित मुलीचे कुटुंबीय उपस्थित होते.
