नंदूरबार l प्रतिनिधी
मध्य प्रदेश राज्यातील सीहोर येथे आयोजीत करण्यात आलेल्या शिवमहाकथापुराण महोत्सवाला प्रचंड गर्दी झाली होती. रुद्राक्ष महोत्सवाच्या पहिल्या दिवशी स्थिती नियंत्रणाबाहेर गेली होती. रुद्राक्ष घेण्याच्या नादात चेंगराचेंगरी झाल्याने मालेगाव तालुक्यातील झोडगे येथील एका महिलेचा मृत्यू झाला होता. अनेक जण बेपत्ता असतानाच आज पहाटे जळगाव जिल्ह्यातील भाविकांच्या वाहनाचा मध्यप्रदेशात अपघात झाल्याची दुर्दैवी घटना घडली.यात दोन महिलांचा मृत्यू झाला असून अनेक जण जखमी आहेत.
मध्य प्रदेश मधील सीहोर येथे शिवमहाकथापुराण कथा व रुद्राक्ष महोत्सवाचे आयोजन करण्यात आले होते. भाविकांची मोठी गर्दी पाहून पंडित प्रदीप मिश्रा यांनी बुधवारी रुद्राक्षांचे वितरण सुरु केले होते. समितीने 20 काउंटर्सच्या मदतीने भाविकांना रुद्राक्ष वाटले. बुधवारी सायंकाळपर्यंत जवळपास दीड लाख रुद्राक्षांचे वाटप झाले होते.
काल गुरुवार रोजी रुद्राक्ष घेण्याच्या नादात चेंगराचेंगरी झाल्याने मालेगाव तालुक्यातील झोडगे येथील मंगलाबाई कांडेकर यांचे निधन झाले.तर बुलढाण्याच्या एका महिलेसह 3 महिला भाविक बेपत्ता झाल्या आहेत.दरम्यान या महोत्सवाला मध्य प्रदेश व महाराष्ट्रासह, हरियाणा, राजस्थान, दिल्ली, गुजरात आदी देशाच्या विविध राज्यातून भाविक येत आहेत. बुधवारी कुबेरेश्वर धाम महादेवाच्या दर्शनासाठी 2 किमी लांब रांग लागली होती.गुरुवारी सकाळची कुबेरेश्वर धाम ते इछावर रोडपर्यंत 17 किमी लांबीचा जाम होता. सीहोर ते इंदूरच्या दिशेने 27 किमी व भोपाळच्या दिशेने 10 किमी लांबीच्या महामार्गावरही जाम होता.
गर्दीमुळे मोबाईल नेटवर्कवरही ताण आला होता. हे प्रकरण ताजे असतानाच मध्यप्रदेशात जुलवानिया गावाजवळ ( MH १९ DV ६७८३) इको गाडीचा अपघात झाला.यात अमळनेर तालुक्यातील पातोंडा येथील दोन महिला शोभाबाई लुकडू पाटील (वय ५२), कमलबाई आत्माराम पाटील (वय ५५) यांचा सिहोर हुन घरी परत येत असताना जागीच मृत्यू झाल्याची घटना आज दि.१७ रोजी सकाळी घडली.
दरम्यान रुद्राक्ष वाटप व कथेचे समापन करण्यात आल्याचे पंडित प्रदीप मिश्रा यांनी जाहिर केले.
