नंदुरबार | प्रतिनिधी
नंदुरबार येथील छत्रपती शिवाजी महाराज नाट्यगृहाच्या प्रांगणात जिभाऊ करंडक राज्यस्तरीय एकांकिका स्पर्धेच्या आयोजनाबाबतची बैठक झाली. बैठकीच्या अध्यक्षस्थानी आयोजन समितीचे सदस्य तथा नाट्यकर्मी मनोज सोनार हे होते. यंदा सदर स्पर्धा हस्ती-जिभाऊ करंडक या नावाने दि.२१ व २२ जानेवारी रोजी नंदुरबार येथील छत्रपती शिवाजी महाराज नाट्यगृहात संपन्न होणार आहे. असे या बैठकीत सर्वानुमते ठरविण्यात आले.
गेल्या अकरा वर्षापासून जिभाऊ करंडक राज्यस्तरीय एकांकिका स्पर्धेचे सातत्यपूर्ण आयोजन होत आहे. सदर आयोजन गाडगेबाबा शैक्षणिक व सांस्कृतिक सेवा मंडळ, शिंदे यांच्या तर्फे राज्यपुरस्कृत शिक्षक जयदेव लिंबा पेंढारकर तथा जिभाऊ यांच्या स्मरणार्थ करण्यात येते. या स्पर्धेत राज्यभरातील नाट्यसंस्था व महाविद्यालये सहभागी होऊन आपला नाट्याविष्कार सादर करीत असतात. या वर्षी मात्र सदर स्पर्धेचे प्रायोजकत्व दि हस्ती को-ऑप बँक लिमिटेड हे करीत असून सहप्रायोजकत्व रोटरी क्लब ऑफ नंदनगरी करणार आहेत. म्हणून यंदा सदर स्पर्धा हस्ती-जिभाऊ करंडक या नावाने दि.२१ व २२ जानेवारी रोजी नंदुरबार येथील छत्रपती शिवाजी महाराज नाट्यगृहात होणार आहे, असे या बैठकीत सर्वानुमते ठरविण्यात आले.
यावेळी नाट्यकर्मी नागसेन पेंढारकर व राजेश जाधव यांनी स्पर्धेच्या यशस्वी आयोजनाबाबत आपले विचार मांडले. जिभाऊ करंडकमुळे नंदुरबार जिल्ह्यात नाट्य चळवळ जोमाने उभी राहिली असून या स्पर्धेच्या माध्यमातून नंदुरबार जिल्ह्यातील कलावंतांना व रसिकांना विविध नाट्य अविष्कार अनुभवयास मिळत असतात असे मत मनोज सोनार यांनी व्यक्त केले. बैठकीत जिल्हा शिक्षक लोकशाही आघाडी (टी.डी.एफ.)चे जिल्हाध्यक्ष एन.टी.पाटील यांनी जिभाऊ करंडकच्या नियोजनाबाबत आपले मत व्यक्त करीत जिभाऊ करंडक यशस्वी होण्याबाबतचा विश्वास व्यक्त केला. यावेळी नाट्यकर्मी रविंद्र कुलकर्णी, क्षमा वसईकर, जितेंद्र खवळे, तुषार सांगोरे यांनी देखील आपले मत व्यक्त केले. कोरोनाच्या पार्श्वभूमीवर सर्व नियमांचे पालन करण्यात येतील, असेही बैठकीत सांगण्यात आले. यावेळी आयोजक आशिष खैरनार यांच्यासोबत कुणाल वसईकर, विनोद ब्राह्मणे, रत्नदीप पवार, नंदुरबार जिल्हा अखिल भारतीय योगशिक्षक महासंघाचे सचिव एस.एन.पाटील आदी उपस्थित होते.
