नवापूर शहरात लाईट बाजारात तिसऱ्या मजल्यावर आग, संसारोपयोगी साहित्य जळून खाक

नंदुरबार l प्रतिनिधी

 नवापूर शहरातील लाईट बाजारात दुपारी साडेबारा वाजता सुमारास राजू भाई नागरमल अग्रवाल यांच्या निवासस्थानी तिसऱ्या मजल्यावर अचानक आग लागल्याने आगीने तात्काळ रुद्ररूप धारण केले. आग विझवण्यासाठी आजूबाजूच्या व्यापारी व नागरिक मदतीला धावून आले. व्यापारानी तात्काळ नवापूर पोलीस व नगरपालिकेच्या अग्निशमक दलाला पाचारण केले.अग्निशामक दल तात्काळ दाखल झाले असून आग विझवण्याचे काम करण्यात आले.या आगीत सुदैवाने कुठलीही जीवित हानी झाली नसून किरकोळ नुकसान झाले आहे.

घराला कश्यामुळे आग लागली याचं कारण अजून समजू शकलेले नाही. अर्धा पाऊण तासानंतर आग नियंत्रणात आली. घटनास्थळी बघ्यांनी मोठी गर्दी केली आहे. भर बाजारात आग लागल्याने मोठी गर्दी झाली आहे. आग विझवण्यासाठी अग्निशमक दल दाखल झाले असून या ठिकाणी काही काळ वाहतुकीचे कोंडी निर्माण झाली. नवापूर पोलिसांनी तात्काळ वाहतूक कोंडी देखील दूर केली आहे.

यात किती नुकसान झाले अजून तरी स्पष्ट झाले नाही. नंतरच याचा उलगाडा होईल परंतु तिसऱ्या मजल्यावरील घर सामान जळून खाक झाल्याची प्राथमिक माहिती समोर आली आहे.स्थानिकांनी मिळेल त्या साधनाने आग विझवण्यासाठी प्रयत्न केला.परंतु तिसऱ्या मजल्यावर आग लागल्याने धुराचे प्रमाण जास्त असल्याने आग विझवण्यासाठी नागरिक व्यापाऱ्यांना दमछाक करावी लागली त्यानंतर अग्निशामक दलाचे बंब आल्याने आग विझवण्याचे काम करण्यात आले. महसूल विभागाने आगीचा पंचनामा करून नुकसान भरपाई मिळावी अशी मागणी अग्रवाल कुटुंबांनी केली आहे.