नंदुरबार | प्रतिनिधी
धडगाव तालुक्यातील उमराणी बु. येथील दारासिंग गोमच्या पावरा यांच्या घरातून ३ हजाराचा मोबाईल चोरणार्‍या आरोपीस स्थानिक गुन्हा अन्वेषण शाखेच्या पथकाने अटक केली आहे. त्याच्याकडून मोबाईल हस्तगत करण्यात आला आहे.
याबाबत अधिक माहिती अशी की, दि.९ डिसेंबर २०२२ रोजी धडगांव पोलीस ठाणे हद्दीतील काकावाडी येथे एक इसम बील नसलेला महागडा मोबाईल कमी किमतीत विकत असल्याची माहिती स्थानिक गुन्हे शाखेचे पोलीस निरीक्षक किरणकुमार खेडकर यांना मिळाली. त्यानुसार त्यांनी स्थानिक गुन्हे शाखेचे पथक तयार केले.पथकाला धडगांव पोलीस ठाणे हद्दीतील काकावाडी परिसरात एका झोपडीच्या आडोश्याला एक संशयीत इसम मिळून आला.
समिर अकिल पठाण (वय २२ रा.काकावाडी, धडगांव) असे त्याचे नाव आहे. त्याने सुमारे १५ ते २० दिवसापूर्वी उमराणी बु. येथे रात्रीच्या वेळी एका उघड्या घरातून सदर मोबाईल चोरी केल्याचे सांगितले. त्याच्या ताब्यातून ३ हजार रुपये किंमतीचा मोबाईल कायदेशीर प्रक्रिया करुन हस्तगत करण्यात आला आहे. त्यास ताब्यात घेण्यात आले आहे.
सदर कामगिरी पोलीस अधीक्षक पी.आर.पाटील, अप्पर पोलीस अधिक्षक निलेश तांबे यांच्या मार्गदर्शनाखाली स्थानिक गुन्हे शाखेचे पोलीस निरीक्षक किरणकुमार खेडकर, सहाय्यक पोलीस निरीक्षक संदीप पाटील, पोलीस नाईक पुरुषोत्तम सोनार, दीपक न्हावी, किरण मोरे यांच्या पथकाने केली.
