नंदूरबार जि. प. च्या अध्यक्ष व उपाध्यक्ष पदाच्या निवडीसाठी काँग्रेसने सदस्यांना बजावला व्हीप

नंदूरबार जिल्हा परिषदेच्या अध्यक्ष व उपाध्यक्ष पदासाठी 17 ऑक्टोंबर रोजी मतदान होणार आहे. शहादा व तळोदा पंचायत समितीच्या सभापती पदासाठी झालेल्या निवडणुकीत काँग्रेस पक्षाला फटका बसला होता.त्यामुळे जिल्हा परिषदेच्या अध्यक्ष व उपाध्यक्ष पदाच्या निवडणुकीत दगा फटका बसू नये यासाठी काँग्रेसतर्फे जिल्हा परिषद सदस्यांना काँग्रेस चे गटनेते सी.के.पाडवी यांनी पक्ष आदेश (व्हीप ) बजावला आहे.

या आदेशात म्हटले आहे की, आपणास या पक्ष आदेशाने कळविण्यात येते की, भारतीय राष्ट्रीय काँग्रेस पक्षाचे नंदुरबार जिल्हा परिषद सदस्य समिती (गट) गठीत असून त्या समितीची नियमावली आपल्या सर्वांना बंधनकारक आहे. आपण भारतीय राष्ट्रीय काँग्रेस पक्षाचे नंदुरबार जिल्हा परिषद सदस्य आहात.

त्या मुळे आपल्यावर या समितीचा व नियमावलीचा आदेश बंधनकारक आहे. त्या अनुषंगाने आपणास ज्ञात आहे की, ग्रामविकास विभाग महाराष्ट्र शासन राजपत्र असाधारण भाग चार -अ दि. 15 जूलै 2022 आदेशान्वये तसेच ग्रामविकास विभागाचे अप्पर मुख्यसचिव यांचा आदेश दि. 15 जूलै 2022 यांचे मुदत वाढीचे आदेश / पत्रान्वये जिल्हा परिषदेच्या अध्यक्ष, उपाध्यक्ष पदाकरीतेचा मुदत वाढीचा कालावधी संपण्यात आला असून ग्रामविकास विभाग महाराष्ट्र शासन राजपत्र असाधारण भाग चार-अ दि.30 सप्टेंबर 2022 अधिसुचना अन्वये जिल्हा परिषद नंदुरबारच्या अध्यक्ष पदाचा आरक्षणाच्या पदाकरीता आरक्षण सोडत जाहीर झाली आहे.

त्याअनुषंगाने जि.प. अध्यक्ष व उपाध्यक्ष पदाच्या निवडीकरीता विशेष सभेचे आयोजन 03/10/2022 पत्रा अन्वये आदेशित आहे. तरी उर्वरीत कालावधीसाठी सन्मानिय जि. प. अध्यक्ष व उपाध्यक्ष, विषय समिती सभापती याची निवड कामी आपले पिठासीन अधिकारी, नंदुरबार याचा कडील पत्र क्र. जा.क्र.ग्रा.प. वि/निपपस/कावि/ 781/ 2022 जि.काँ. नंदुरबार दि.06/10/2022 अन्वये जि.प. अध्यक्ष व उपाध्यक्ष निवड होणे कामी निवड प्रक्रिया दि. 17/10/2022 वार सोमवार रोजी दु. 11 वाजता जिल्हा परिषद सभागृह, नंदुरबार येथे घेण्यात येणार आहे. तरी आपण दि. 17/10/2022 रोजी जिल्हा परिषद अध्यक्ष, उपाध्यक्ष, सभापती निवड प्रक्रियेत भारतीय राष्ट्रीय काँग्रेस पक्षाच्या वतीने नंदुरबार जिल्हा परिषद गट नेता निवडणूकी पूर्वी आदेशीत करतील त्या उमेदवारास अध्यक्ष, उपाध्यक्ष विषय समिती सभापती पदासाठी मतदान करणे आपल्यावर बंधनकारक आहे.

सदर दिवशी आपण न चुकता वेळेवर बैठकीस उपस्थित रहावे व पक्ष आदेश पाळावा. जर आपण पक्ष आदेश प्रमाणे न वागल्यास आपणा विरुध्द महाराष्ट्र लोकल बॉडी डिस क्वॉलीफीकेशन ॲक्ट व रुल्स अन्वये मधील तरतूदी नुसार कार्यवाहीस पात्र राहतील, (स्थानिक स्वराज्य संस्था सदस्या अपात्रता अधिनियम व त्यातील नियम) नुसार आपले विरुध्द कारवाई करण्यात येईल याची नोंद घ्यावी. तसेच विषय समिती सभापती याची निवडकामी देखील हा पक्ष आदेश लागू राहील. कामी सर्वांनी पक्ष आदेश (व्हीप) पाळावा असे आदेशात नमूद करण्यात आले आहे.