नंदूरबार l प्रतिनिधी
नंदुरबार शहरातील बांधकाम व्यवसायीकाची फसवणूक करणाऱ्यास न्यायालयाने 7 वर्ष सश्रम कारावास व 13 लाख 2 हजार रुपये दंडाची शिक्षा
ठोठावली आहे.
याबाबत अधिक माहिती अशी की, चेतन वसंत धामणे रा . प्लॉट नंबर 12 ( अ ) , मथुरा किसन नगर , शिरपुर जि . धुळे हे शासकीय बांधकाम काँट्रॅक्टर असून जुबेर अली युनुस अली सैय्यद याने चेतन धामणे यांना बांधकाम मटेरीयल होलसेल दराने देतो असे सांगून दि. 4 फेब्रुवारी 2021 ते दि.5 मार्च 2021 रोजी दरम्यान बांधकाम मटेरीयलचे 14 लाख 13 हजार 060 रुपये रोख ॲडव्हान्समध्ये घेवून बांधकाम मटेरीयलचे साहित्य न देता चेतन धामणे यांची फसवणूक केली म्हणून चेतन धामणे यांच्या तक्रारीवरून दि
5 अगस्त 2021 रोजी उपनगर पोलीस ठाण्यात भा.द.वि. कलम 406,409,420,504,506 अन्वये जुबेर अली युनुस अली सैय्यद रा . विष्णू नगर , निझामपूर ता.साक्री जि . धुळे याच्याविरुध्द् गुन्हा दाखल करण्यात आला होता . सदर गुन्ह्याबाबत आरोपी नामे जुबेर अली युनुस अली सैय्यद यास तात्काळ अटक करण्यात आली होती . उपनगर पोलीस ठाण्याचे पोलीस उप निरीक्षक देविदास सोनवणे यांनी सदर गुन्ह्याचा अत्यंत शास्त्रोक्त पध्द्तीने तपास करीत महत्वाचे पुरावे जमा केले होते . तसेच गुन्हा दाखल झाल्यानंतर आरोपी जुबेर अली युनुस अली सैय्यद याच्याविरुद्ध दोषारोपपत्र मुख्य न्यायदंडाधिकारी , नंदुरबार विनोद चव्हाण यांच्या न्यायालयात 59 दिवसातच सादर केले होते . मुख्य न्यायदंडाधिकारी , नंदुरबार यांनी साक्षीदारांचे जबाब , पंच , आणि परिस्थितीजन्य पुरावे तपास अधिकारी यांची साक्ष यासर्व बाबींचा विचार करुन आरोपी हा न्यायालयीन कोठडीत असतांनाच खटला चालविण्याचे ठरविले मुख्य न्यायदंडाधिकारी , नंदुरबार यांनी अतिशय जलदगतीने खटला चालवुन खटल्याची सुनावणी पुर्ण करुन आरोपी जुबेर अली युनुस अली सैय्यद यास आज दि. 12 ऑगस्ट 2022 रोजी 7 वर्ष सश्रम कारावास व 13 लाख 2 हजार रुपये दंडाची शिक्षा सुनावली आहे .
सदर गुन्ह्याचा तपास नंदुरबार जिल्ह्याचे पोलीस अधीक्षक पी . आर . पाटील , अपर पोलीस अधीक्षक विजय पवार , उप विभागीय पोलीस अधिकारी नंदुरबार सचिन हिरे , उपनगर पोलीस ठाण्याचे सहा . पोलीस निरीक्षक दिनेश भदाणे यांचे मार्गदर्शनाखाली उपनगर पोलीस ठाण्याचे पोलीस उप निरीक्षक देविदास सोनवणे यांनी केला असून न्यायालयात खटल्याचे कामकाज अभियोग पक्षातर्फे सहाय्यक सरकारी अभियोक्ता ॲड . सुनिल पाडवी यांनी पाहिले होते . पैरवी अधिकारी म्हणुन पोलीस हवालदार दिपक डुमकुल यांनी कामकाज केले आहे .
