नंदुरबार l प्रतिनिधी
शहरात घरफोडी व मंदिरात चोरी करणाऱ्या आरोपीसह दोन विधी संघर्षित बालकांना अटक करण्यात आली आहे. त्यांच्याकडून २० हजार रुपये किंमतीचा मुद्देमाल दखील हस्तगत करण्यात आला आहे. ही कामगिरी स्थानिक गुन्हे शाखेने केली आहे.
याबाबत अधिक माहिती अशी की, नंदूरबार शहरात २० जुलै रोजी दत्त कॉलनीत दत्त मंदिराचे दरवाजाचे कुलूप तोडून दानपेटीतील १७५० रुपये रोख व एक लहान तांब्याची कळशी चोरी गेली. तसेच शहरातील तळोदा रोडवरील तिरुपती प्लाझामधील दुकान नंबर जी ०९ मध्ये १८ व १९ जुलैच्या दरम्यान बियर पार्लर दुकानातील गल्ल्यातून २७ हजार रुपये व सहा हजारांचे मोबाईल चोरीस गेले.
यासंदर्भात वेगवेगळ्या पोलीस ठाण्यात गुन्हे दाखल आहेत. जिल्हा पोलीस अधीक्षक पी. आर. पाटील यांना चोरी करणारे आरोपी व विधी संघर्षित बालकांची माहिती मिळाली. त्यानुसार दत्त मंदीरात चोरी करणाऱ्या विधी संघर्षित बालकास स्थानिक गुन्हे शाखेच्या पथकाने शहरातील सिंधी कॉलनी परिसरात ताब्यात घेतले.
संबंधित मुलाकडून दत्त मंदिराच्या गल्ल्यातील ७२० रुपये रोख व एक हजार ८०० रुपये किंमतीची एक तांब्याची कळशी हस्तगत करण्यात आली. तसेच शहरातील तिरुपती प्लाझामधील घरफोडीतील गिरीविहार गेट भिलाटी परिसरातून संशयितांना ताब्यात घेतले आहे.
त्यानुसार स्थानिक गुन्हे शाखेचे पोलीस निरीक्षक रविंद्र कळमकर व त्यांच्या पथकाने बस स्थानक
परिसरातून संशयीत व विधी संघर्षित बालकास ताब्यात घेतले. संशयिताने तिरुपती प्लाझामधील एका बियर शॉपीत चोरी केल्याचे सांगितले. त्यानुसार त्यांच्याकडून ७ हजार ४०० रुपये रोख व एक मोबाईल असा एकूण १३ हजार ४०० रुपये किंमतीचा मुद्देमाल जप्त केला.
त्यांना उपनगर पोलीस ठाण्याच्या ताब्यात देण्यात आले आहे. ही कामगिरी पोलीस अधीक्षक पी. आर. पाटील यांच्या मार्गदर्शनाखाली स्थानिक गुन्हे शाखेचे पोलीस निरीक्षक रविंद्र कळमकर, पोलीस हवालदार राकेश वसावे, पोलीस नाईक राकेश मोरे, मोहन ढमढेरे, पोलीस कॉन्सटेबल अभय राजपूत, आनंदा मराठे यांच्या पथकाने केली आहे.
