नंदूरबार l प्रतिनिधी
नंदुरबार जिल्ह्यात कायदा व सुव्यवस्था अबाधित राहावी तसेच गुन्हेगारांवर वचक राहावा याकरीता नंदुरबार जिल्ह्याचे पोलीस अधीक्षक पी . आर . पाटील यांनी नंदुरबार जिल्ह्यातील गुन्हेगारी टोळीतील एकुण 5 इसमांना महाराष्ट्र पोलीस कायदा 1951 चे कलम 55 च्या प्राप्त अधिकारान्वये नंदुरबार जिल्ह्यातून 2 वर्षांसाठी हद्दपार केलेले आहे . हद्दपार करण्यात आलेले सर्व 5 इसम हे शहादा तालुक्यातील आहेत .
नंदुरबार जिल्ह्याचे पोलीस अधीक्षक पी . आर . पाटील यांनी नंदुरबार जिल्हा पोलीस दलाचा कार्यभार स्वीकारल्यापासुन नंदुरबार शहरासह जिल्ह्यात कायदा व सुव्यवस्थेसाठी बाधा ठरणारे तसेच मालमत्तेविरुध्दचे गुन्हे करणाऱ्या इसमांची माहिती घेतली .
त्यांच्यावर दाखल गुन्ह्यांचा आढावा घेतला असता शहादा , म्हसावद पोलीस ठाणे हद्दीतील काही आरोपी त्यांची दहशत व वचक ठेवण्यासाठी बेकायदेशीररीत्या टोळी तयार करुन नियमितपणे मालमत्तेविरुध्दचे गुन्हे करण्याचे सवयीचे असल्याचे त्यांचे निदर्शनास आले .
त्यांच्यापासून सामान्य नागरिकांच्या मालमत्तेस व जिवीतास धोका निर्माण झालेला असल्याचे त्यांना आढळून आले . त्याप्रमाणे अशा आरोपीतांवर कठोर प्रतिबंधक कारवाई करावी याबाबत पोलीस अधीक्षक , नंदुरबार पी . आर . पाटील यांनी प्रभारी अधिकारी यांना आदेशीत केले होते .
शहादा व म्हसावद पोलीस ठाणे हद्दीत राहणाऱ्या टोळीतील 5 इसमांविरुध्द् मालमत्तेविरुध्दचे गंभीर गुन्हे दाखल आहेत . त्यावरुन म्हसावद पोलीस ठाणेकडून एक टोळीस हद्दपार करणेबाबतचा प्रस्ताव पोलीस अधीक्षक कार्यालयात प्राप्त झाला .
सदर हद्दपार प्रस्तावाचा नंदुरबार जिल्ह्याचे पोलीस अधीक्षक पी . आर . पाटील यांनी आढावा घेवुन प्रस्तावाची छाननी केली . तसेच योग्य ती कायदेशीर प्रकिया पाडून 5 इसमांना 02 वर्ष कालावधीसाठी नंदुरबार जिल्ह्यातून हद्दपार करण्याचे आदेश नंदुरबार जिल्ह्याचे पोलीस अधीक्षक पी . आर . पाटील यांनी दिले आहेत . टोळीतील हद्दपार इसमांची नांवे योगेश कृष्णा पवार वय 25 रा . सुलवाडे पो . सुलतानपूर ता . शहादा, अजय आंबालाल मोरे वय -24 रा . सुलवाडे पो . सुलतानपूर ता . शहादा, सोमनाथ काशिनाथ दशरथ रा . सुलवाडे पो . सुलतानपूर ता . शहादा, आकाश राजु शेमळे वय 20 रा . सुलवाडे पो . सुलतानपूर ता . शहादा, अजय ऊर्फ टायगर राजेंद्र पावरा वय -22 रा . ब्राम्हणपुरी ता . शहादा अशी आहेत .
हद्दपार आदेशाची अमंलबजावणी तातडीने करण्यात येत असुन हद्दपार इसमांनी आदेश प्राप्त झाल्यावर 48 तासाचे आत तातडीने जिल्हा हद्दीबाहेर निघुन जाणेबाबत आदेश देण्यात आले आहेत .
तसेच हद्दपार इसमांनी नंदुरबार जिल्ह्यात येतांना मा . पोलीस अधीक्षक , नंदुरबार व मा . न्यायालयाची परवानगी घेणे आवश्यक आहे . हद्दपार आदेशाचे उल्लंघन झाल्यास त्यांचे विरुध्द् प्रचलीत कायद्यानुसार कारवाई करण्यात येईल . तसेच वरील 5 हद्दपार इसम नंदुरबार जिल्ह्यात कुठेही दिसुन आल्यास तात्काळ स्थानिक पोलीस ठाणे किंवा पोलीस नियंत्रण कक्ष , नंदुरबार येथे कळवावे असे पोलीस प्रशासनाच्या वतीने कळविण्यात आले आहे .
