नंदूरबार l प्रतिनिधी
तळोदा तालुक्यातील बंधारा शिवारात वादळी वाऱ्यासह झालेल्या पावसातशेतकऱ्याच्या शेतातील मुख्यमंत्री सोलार कृषी पंप योजनेअंतर्गत मिळालेल्या सोलर पंपचे पत्रे वादळी वाऱ्याने उडून गेल्याने मोठे नुकसान झाले आहे.
नंदुरबार जिल्ह्यात गेल्या दोन दिवसांपासून ढगाळ वातावरण असून शेतकऱ्यांसह सर्वसामान्य नागरिकांना दमदार पावसाची प्रतीक्षा लागली आहे. काल दि.10 जून रोजी संध्याकाळच्या सुमारास सातपुड्याच्या पायथ्याशी
तळोदा तालुक्यातील सीतापावली, बंधारा, राणीपूर, जमोणीपाडा, तोलाचापाडा, वरपाडा, कोठार, सावरपाडा या गावांमध्ये तासभर वादळी वाऱ्यासह दमदार पावसाने हजेरी लावली होती. त्यासोबत नंदुरबार तालुक्यातील कोपर्ली, मांजरे परिसरात देखील 15 ते 20 मिनिटे पावसाने हजेरी लावली होती.
सातपुड्याच्या पायथ्याशी तळोदा तालुक्यातील बंधारा शिवारात वादळी वाऱ्यासह झालेल्या पावसात जोलूसिंग गोंड्या ठाकरे या शेतकऱ्याच्या शेतातील मुख्यमंत्री सोलार कृषी पंप योजनेअंतर्गत मिळालेल्या सोलर पंपचे पत्रे वादळी वाऱ्याने उडून गेल्याने मोठे नुकसान झाले आहे.
सदर शेतकऱ्याच्या नुकसानीचे पंचनामे करून मदत मिळावी तसेच सोलर कृषी पंपाचे भरलेला विमा मंजूर व्हावा अशी मागणी नुकसानग्रस्त शेतकरी जोलूसिंग गोंड्या ठाकरे यांनी केली आहे.
काल सातपुड्याच्या पायथ्याशी दमदार पावसाने हजेरी लावली असून जिल्ह्यातील नवापूर, शहादा, धडगाव, अक्कलकुवा, मोलगी परिसरातील नागरिकांना मान्सूनची प्रतीक्षा कायम आहे.