नंदुरबार l प्रतिनिधी
अक्कलकुवा तालुक्यातील वाण्याविहिर येथील एका हॉटेलवर व खापर ते अक्कलकुवा रस्त्यावरील एका हॉटेलवर अशा दोघा हॉटेलवर महावितरणच्या भरारी पथकाने धाड टाकली असता दोघा हॉटेल चालकांनी सुमारे ४० हजार रुपये किंमतीची वीज चोरी केल्याचे आढळून आले. याप्रकरणी दोघा हॉटेल चालकांविरोधात गुन्हा दाखल करण्यात आला आहे.
याबाबत पोलिस सूत्रांनी दिलेल्या माहितीनूसार, अक्कलकुवा तालुक्यातील वाण्याविहिर येथील तनसुख गोवर्धन शर्मा यांच्या मालकीच्या जनता हॉटेल येथे मागील सहा महिन्यांपासून महाराष्ट्र राज्य विद्युत वितरण कंपनीची १० हजार ६९० रुपये किंमतीची वीज चोरी केल्याचे आढळून आले.
तसेच खापर ते अक्कलकुवा रस्त्यावरील स्टार हॉटेल हरियाणा मेवात येथे अब्दुल करीम अब्दुल लतीफ बलोच याने ३० हजार ५५० रुपये किंमतीची वीज चोरी केल्याचे आढळून आले.
याबाबत महावितरणच्या भरारी पथकातील कार्यकारी अभियंता बकुळ रामदास मानवटकर यांच्या फिर्यादीवरुन अक्कलकुवा पोलिस ठाण्यात दोघा हॉटेल चालकांविरोधात भारतीय विद्युत अधिनियम २००३ चे कलम १३५ प्रमाणे दोन वेगवेगळे गुन्हे दाखल करण्यात आले आहेत.
