नंदुरबार | प्रतिनिधी
शहादा-खेतीया रस्त्यावर सुलतानपूर फाटयाजवळ कारने मोटरसायकलला धडक दिल्याने तीन जण जखमी झाल्याची घटना घडली आहे. याप्रकरणी अज्ञात चालकाविरूध्द गुन्हा दाखल करण्यात आला आहे.
याबाबत पोलीस सुत्रांनी दिलेल्या माहितीनुसार, शहादा-खेतीया रस्त्यावरील सुलतानपूर फाटयाजवळ कार (क्र.जी.जे.०५-सी.ई.१३४६) यावरील अज्ञात चालकाने त्याच्या ताब्यातील कारही भरधाव वेगाने चालवित रस्त्याच्या परिस्थितीकडे दुर्लक्ष करून
समोर चालत असलेल्या मोटरसायकल (क्र.एम.एच.१८- आर.बी.४३०४) हिला मागून ठोस दिली. या अपघातात मोटरसायकलस्वार आधार दिलीप मगरे यांच्या पायाचा पंजाला गंभीर दुखापत झाली.
तसेच कौशल्याबाई मगरे, मुन्ना भिल यांनाही दुखापत झाली. दरम्यान अपघात होताच चालक त्याठिकाणाहून पळुन गेला.
याप्रकरणी आधार दिलीप मगरे रा.वडगांव (ता.शहादा) याच्या फिर्यादीवरून अज्ञात कारचालकाविरूध्द म्हसावद पोलीस ठाण्यात भादंवि कलम २७९, ३३७, ३३८, ४२७ सह मोटरवाहन कायदा कलम १८४, १३४, १८७ प्रमाणे गुन्हा दाखल करण्यात आला आहे. याप्रकरणी पुढील तपास हे.कॉ. जितेंद्र पाडवी करीत आहेत.
