नंदूरबार l प्रतिनिधी
शहादा तालुक्यातील वाघर्डे येथील सखाराम मोते यांनी नंदुरबार येथील अनुसूचित जमाती प्रमाणपत्र तपासणी समितीकडे बेकायदेशीररित्या प्राप्त केलेले बोगस जात वैधता प्रमाणपत्र व त्याआधारित सरकारी नोकरी प्राप्त करून
आदिवासी समाजाचे नुकसान केल्याने अखिल भारतीय आदिवासी बारेला समाजाच्यावतीने तक्रार दाखल केल्यानंतर सुनावणीअखेर तिघांचे जात वैधता प्रमाणपत्र रद्दचे आदेश देण्यात आल्याचे श्री.मोते यांनी दिलेल्या प्रसिध्दीपत्रकात म्हटले आहे.
शहादा येथील सखाराम जहांग्या मोते यांनी अखिल भारतीय आदिवासी बारेला समाजाच्यावतीने तक्रारदार म्हणून नंदुरबार पोलीस मुख्यालयातील पोलीस कर्मचारी कमलसिंग सत्तरसिंग जाधव, दरा येथील के.डी.गावीत माध्यमिक विद्यालयातील माध्यमिक शिक्षक बखतसिंग सत्तरसिंग जाधव व त्यांचे भाऊ चुनिलाल दगा जाधव यांचे विरोधात त्यांनी बेकायदेशीररित्या प्राप्त केलेले बोगस जात वैधता प्रमाणपत्र व त्याआधारित सरकारी नोकरी प्राप्त करून घेवून
आदिवासी समाजाचे नुकसान केले. त्यांनी पावरा या अनुसूचित जमातीशी संलग्न असल्याचा बनाव रचून खोटे कागदपत्र शासन दप्तरी सादर करून आदिवासींचे लाभ प्राप्त केले.
व पर्यायाने शासनाची तथा आदिवासी समाजाची फसवणूक केल्याने सखाराम जहांग्या मोते यांनी अनुसूचित जमाती प्रमाणपत्र तपासणी समिती नंदुरबार याकडे ॲड. जगदीश कुवर यांच्यामार्फत तक्रार दाखल करून
त्याअनुषंगाने सुनावणी होवून तिन्ही लोकांचे जात वैधता प्रमाणपत्र रद्द करून समितीने कलम १० व ११ अन्वये कारवाईचे आदेश दिले आहेत. तक्रारदारामार्फत ॲड. जगदीश कुवर यांनी माहितगार विधिज्ञ म्हणून काम केले असून त्यांना ॲड. भगतसिंग पाडवी यांनी सहकार्य केले.