नंदुरबार शहरात राजकीय हस्तक्षेप थांबवून प्रस्तावित विकासाकामे पावसाळ्यापूर्वी पूर्ण करा, भाजपा नगरसेवकांचे पालिका मुख्याधिकाऱ्याना निवेदन

नंदुरबार l प्रतिनिधी
शहरातील हिंदुहृदय सम्राट स्व. बाळासाहेब ठाकरे जलतरण तलावापासून ते चैतन्य चौक व मंगळ बाजारापर्यंत गटारीचे सांडपाणी नेहमी रस्त्यावर वाहते. यामुळे वाहने घसरून किरकोळ अपघात होत असून डॉ.हेमंत चौधरी यांच्या दवाखानापासून ते साक्री नाक्यापर्यंतच्या रस्त्याची दुरवस्था झाली आहे. असे असताना याकामांकडे संबंधित ठेकेदार दुर्लक्ष करीत असून पावसाळ्यापूर्वी ही कामे तात्काळ करण्यात यावी. तसेच सदर कामांमध्ये राजकीय हस्तक्षेप होत असल्याने सदर कामांना उशीर होत आहे. म्हणून राजकीय हस्तक्षेप थांबविण्यात यावा. अन्यथा भाजपाच्या वतीने आंदोलन करण्यात येईल, असा इशारा नंदुरबार नगरपालिकेतील भाजपाच्या नगरसेवकांनी दिला आहे.
याबाबत नंदुरबार नगरपालिकेतील भाजपाच्या नगरसेवकांनी पालिकेच्या मुख्याधिकाऱ्यांना निवेदन दिले आहे. त्यात म्हटले आहे की, नंदुरबार शहरातील मध्यवर्ती भागात असलेल्या हिंदुरुदय सम्राट स्व. बाळासाहेब ठाकरे जलतरण तलावापासून ते थेट मंगळ बाजारापर्यंत गटारीचे सांडपाणी नेहमी रस्त्यावर वाहते. या सांडपाण्यामुळे अनेकदा किरकोळ अपघातही घडत आहेत. तर परिसरातील नागरिकांना दुर्गंधी सहन करावी लागते. डॉ. हेमंत चौधरी यांच्या दवाखाना पासून ते साखरी नाक्यापर्यंतच्या रस्त्याची ही दयनीय अवस्था झाली आहे. या संदर्भात भाजपाच्या नगरसेवकांनी वारंवार पाठपुरावा करून पालिका प्रशासन व शासनाचे लक्ष वेधले. परंतु अद्यापपर्यंत त्या परिसरात भूमिगत गटार व थ्रीमिक्स सिमेंट रस्त्याची निविदा निघून दोन महिने झाले आहेत. मात्र या कामांमध्ये राजकीय हस्तक्षेप होत असल्याने सदर कामांना विरोध विलंब होत असल्याचाही आरोप भाजपा नगरसेवकांनी केला आहे. पावसाळ्यापूर्वी सदरची कामे तात्काळ पूर्ण करण्यात यावी. तसेच या कामांमधील राजकीय हस्तक्षेप थांबविण्यात यावा. अन्यथा आंदोलन करण्यात येईल, असा इशारा नंदुरबार नगरपालिकेतील विरोधी पक्षनेता तथा भाजपाचे नगरसेवक ॲड. चारुदत्त कळवणकर, नगरसेवक प्रशांत चौधरी, नगरसेवक गौरव चौधरी, नगरसेवक आकाश चौधरी, नगरसेविका संगीता वसईकर, नगरसेविका सिंधुबाई माळी आदींनी निवेदनातून दिला आहे.