नवापूर l प्रतिनिधी
नवापूर तालुक्यातील वाकीपाडा पोल्ट्रीमधील शीतगृहात साठवलेले ७५ हजार रुपये किंमतीची अंडी चोरुन नेतांना तेथील पर्यवेक्षक, चालक, द्वारपाल व इतर तिघांना पोल्ट्री मालकानेच रंगेहाथ पकडले. पोलिसांनी अंडीसह चार लाखाचा मुद्देमाल जप्त केला असुन पाच संशयितांना अटक केली आहे.
पोलीस सूत्रांच्या माहितीनुसार, नवापूर शहराजवळ वाकीपाडा शिवारात अब्दुल सलाम बलेसरिया यांच्या मालकीचे पोल्ट्री फार्म व शीतगृह आहे. दि. २७ एप्रिल रोजी होते. मध्यरात्री अडीच वाजेच्या सुमारास अब्दुल सलाम बलेसरिया हे मुलगा मोहंमद व अतिक यांना सोबत घेऊन अचानक शीतगृहात गेले असता तेथील मुख्य दरवाजा उघडा दिसून आला. शीतगृहासमोर टेम्पो उभा दिसला. त्यात काही इसम शीतगृहातील साठवलेली अंडीचा ट्रे टेम्पोमध्ये भरतांना दिसून आले. टेम्पोजवळ गेले असता कामावर असलेले पर्यवेक्षक, चालक, द्वारपाल व इतर असल्याचे दिसून आले. मालकांना पाहुन त्यांनी तारकुंपण ओलांडून पळ काढला. मात्र अंडी वाहतूक करणारा पर्यवेक्षक जुबेर गुलाब सैय्यद हा शीतगृहातून बाहेर येतांना मालकाच्या हाती लागला. टेम्पोमध्ये सुमारे ७५ हजाराचे अंडे ठेवलेले होते.मोहंमद अब्दुल सलाम बलेसरिया यांनी नवापूर पोलीसांत घटनेची खबर देउन जुबेर गुलाब सैय्यद यांस आपल्या इतर साथीदारांबाबत विचारणा केली असता तेथे कामावर असलेला बिलालखान फिरोजखान, महंमद इब्राहिम माकडा, चालक नितेश गोविंद मावची, द्वारपाल जयराम, रवींद्र मारग्या भिल, टेम्पो चालक रवींद्र नाईक रा. सोनगढ़ व अंडी खरेदी करणारा मुकेश नावाचा व्यापारी असे असल्याचे सांगितले.
तेथे अंडीने भरलेले टेम्पो, दोन दुचाकी वाहन असा पावणेपाच लाखाचा मुद्देमाल ताब्यात घेतला. पोलिसांनी जुबेर गुलाब सैय्यद बिलाल खान फिरोजखान, महंमद इब्राहिम माकडा, चालक नितेश गोविंद मावची व रवींद्र मारग्या भिल यांना तातडीने अटक केली. पाचही संशयितांना नवापूर न्यायालयाने ३० एप्रिल पर्यंत पोलीस कोठडी ठेवण्याचे आदेश दिले आहे. उर्वरित दोन फरार संशयितांचा शोध घेऊन त्यांना अटक करण्यासाठी पथक रवाना करण्यात आल्याची माहिती पोलीस निरीक्षक बाळासाहेब भापकर यांनी दिली. या घटनेचा तपास पोलिस उपनिरीक्षक अशोक मोकळं करीत आहेत.
