नंदुरबार l प्रतिनिधी
नंदुरबार ते नवापूर रस्त्यावरील ढेकवद गावाजवळ वाहनाने धडक दिल्याने दुचाकीस्वार ठार झाल्याची घटना घडली. याप्रकरणी वाहन चालकाविरुद्ध गुन्हा दाखल करण्यात आला आहे.
याबाबत पोलिस सूत्रांनी दिलेल्या माहितीनूसार, नवापूर तालुक्यातील घोगळपाडा येथील दिलीप सखाराम वळवी हे दुचाकीने (क्र.एम.एच.४१ क्यू ६६५९) नंदुरबार ते नवापूर रस्त्याने जात होते. यावेळी मिलींद रविंद्र चौधरी (रा.नंदुरबार) याने त्याच्या ताब्यातील चारचाकी वाहन रस्त्याच्या परिस्थितीकडे दुर्लक्ष करुन भरधाव वेगात वाहन चालवून ढेकवद गावाजवळ दुचाकीला समोरुन धडक दिल्याने अपघात घडला. घडलेल्या अपघातात दिलीप वळवी यांना गंभीर दुखापत झाल्याने त्यांचा मृत्यू झाला. तसेच दोन्ही वाहनांचेही नुकसान झाले. याबाबत सुनिल सखाराम वळवी यांच्या फिर्यादीवरुन नंदुरबार तालुका पोलिस ठाण्यात मिलींद जाधव याच्याविरुद्ध भादंवि कलम ३०४ (अ), २७९, ३३७, ३३८, ४२७ व मोटार वाहन कायदा कलम १८४ प्रमाणे गुन्हा दाखल करण्यात आला आहे. पुढील तपास पोहेकॉ.सुरेश वसावे करीत आहेत.
