नंदुरबार । प्रतिनिधी
नंदुरबार शहरातील कंजरवाडा परिसरात दि. 22 रोजी दोन गटात सशस्त्र हाणामारी झाल्याची घटना घडली. यात घरासह वाहनाची मोठया प्रमाणात तोडफोड झाल्याचे समजते. कौटूंबिक वादातून दोन गट आमने सामने भिडले होते. याबाबत उशिरापर्यंत शहर पोलीस ठाण्यात गुन्हा दाखल करण्याची प्रक्रिया सुरू होती.
याबाबत सुत्रांनी दिलेल्या माहितीनुसार, नंदुरबार शहरातील कंजरवाडा परिसरात दि. 22 फेब्रुवारी रोजी दुपारी 1.30 वाजेच्या सुमारास कौटूंबिक वादातून दोन गटात सशस्त्र हाणामारी झाली.यावेळी मोठया प्रमाणावर वाहनांची व घराची तोडफोड करण्यात आली. या हाणामारीमुळे परिसरातील नागरीकांमध्ये दहशतीचे वातावरण निर्माण झाले होते. घटनेची माहिती मिळताच उपविभागीय पोलीस अधिकारी सचिन हिरे पोलीस निरीक्षक किरण खेडकर, उपपोलीस निरीक्षक प्रविण पाटील हे तात्काळ पथकासह दाखल झाले होते. त्यांनी परिस्थिती नियंत्रण मिळवले. हाणामारीच्या घटनेनंतर काहीजणांना पोलीसांनी ताब्यात घेतल्याचे कळते. नंदुरबार शहर पोलीस ठाण्यात रात्री उशिरापर्यंत गुन्हा दाखल करण्याची प्रक्रिया सुरू होती.
