नंदुरबार | प्रतिनिधी
तळोदा पोलीस स्टेशन हद्दीतील सिलींगपुर ता . तळोदा जि.नंदुरबार येथे अवैधरित्या दारुविक्री करणार्या आरोपीस तळोदा न्यायालयाने ३ वर्ष सश्रम कारावास व रुपये २५ हजार दंडाची शिक्षा ठोठावली आहे .
याबाबत अधिक माहिती अशी की, तळोदा पोलीस ठाणेचे प्रभारी अधिकारी पोनि पंडीत सोनवणे व पोलीस कर्मचारी कर्तव्यावर असतांना गुप्त बातमीदारामार्फत बातमी मिळाली होती की , सिलींगपुर गावातील दिपक फत्तु पाडवी हा त्याच्या राहत्या घराच्या पाठीमागे आडोश्याला गावठी हात भटटीची दारू कब्जात बाळगून चोरटी विक्री करीत आहे . अशी खात्रीशीर बातमी मिळाल्याने पोनि पंडीत सोनवणे यांचे मार्गदर्शनाखाली पोना विनोद नाईक यांनी पोलीस स्टाफसह आरोपी जेथे मातीचे माठ मध्ये गावटी हात भटटीची दारु घेवुन विक्रीकरीत दिपक फत्तु पाडवी रा.सिलींगपुर ता . तळोदा यास जागीच पकडले होते . छापा केला त्यावेळेस त्याच्या ताब्यातुन १० लिटर गावठी हात भटटीची दारू जप्त करण्यात आली होती . सदर जप्त केलेल्या गावठी हात भटटीची दारुचा पंचनामा करून रासायनिक विश्लेषणाकरीता दारुचा नमुना काढण्यात आला होता . याप्रकरणी दिपक फत्तु पाडवी याच्या विरूध्द तळोदा पोलीस ठाण्यात गुन्हा दाखल करण्यात आला होता . सदर गुन्हयाचा पुढील सखोल तपास पो . ना . विनोद नाईक , तळोदा पोलीस ठाणे यांनी करून आरोपीविरुध्द न्यायालयात दोषारोपपत्र सादर केले होते . सदर खटल्याची सुनावणी एस . डी . हरगुडे , जे.एम.एफ.सी. न्यायाधीश तळोदा यांच्या कोर्टात होवुन आरोपी दिपक फत्तु पाडवी रा . सिलींगपुर ता . तळोदा याच्या विरुध्द महाराष्ट्र दारुबंदी कायदा ६५ ( ई ) प्रमाणे गुन्हा शाबीत झाल्याने न्यायालयाने सदर आरोपीस ३ वर्ष सश्रम कारावास व रुपये २५ हजार दंडाची शिक्षा सुनावली आहे . सदर खटल्याचे कामकाज अभियोग पक्षातर्फे विशेष सरकारी वकील ऍड . एम . आय . मन्सुरी यांनी पाहीले असुन खटल्यात पैरवी अधिकारी म्हणून पोहेकों देविदास वाडीले यांनी कामकाज केले आहे .
