नंदुरबार जिल्ह्यात थंडीमध्ये वाढ, थंड हवेचे ठिकाण तोरणमाळचे तापमान पोहचले ११अंश सेल्सिअसपर्यंत

नंदूरबार l प्रतिनिधी
नंदुरबार जिल्ह्यात सध्या हुडहुडी वाढली असून शहरी भागात तापमान १३ अंश सेल्सिअसपर्यंत पोहोचले आहे. तर राज्यातील दोन नंबरचे थंड हवेचे ठिकाण म्हणून प्रसिद्ध असलेल्या तोरणमाळ, डाब, मोलगी परिसरात तापमान ११ अंश सेल्सिअसवर पोहोचले आहे.
भारतीय हवामान विभागाकडून वायव्य आणि लगतच्या मध्ये भारत आणि गुजरातच्या बहुतेक भागात तीव्र थंडीची लाट येण्याची शक्यता असल्याने नंदूरबार जिल्ह्याचा पारा उतरून थंडी वाढण्याची शक्यता वर्तवली होती.
जिल्ह्यात पुढील काही दिवस थंडीची लाट येण्याची शक्‍यता कृषी विज्ञान केंद्र हवामान शास्त्रज्ञ सचिन फड यांनी व्यक्त केली असून नागरिकांनी थंडीपासून बचावासाठी गरम कपडे परिधान करावे तसेच केळी, पपई फळबागा प्लास्टिकने गुंडाळावे, गाय, बैल, बकरी आदी जनावरांना उघड्यावर न बांधता बंद घरात गोठ्यात बांधावे, कुकुट पालन शेतकऱ्यांनी शेडला पडदे लावून १०० डिग्री तापमान लाईटचा वापर करावा, असे आवाहन कृषी विज्ञान केंद्रातर्फे करण्यात येत आहे. उत्तर महाराष्ट्रातील नंदुरबारच्या तोरणमाळ, डाब मोलगी परिसरात तापमानाचा पारा ११ अंश सेल्सिअसवर पोहोचला आहे. त्यामुळे थंडीने जनजीवन विस्कळीत होत आहे. जिल्ह्याच्या अनेक गावांमध्ये थंडीमुळे रस्त्यावर सकाळी उशीरापर्यंत सामसूम दिसत आहे.