कोळदे गटातून डॉ.सुप्रिया गावीतांविरोधात शिवसेनेतर्फे नंदुरबारचे उपनगराध्यक्ष रविंद्र पवार उमेदवार अर्ज दाखल करणार?
नंदुरबार| प्रतिनिधी
जिल्हा परिषदेच्या ११ गटांची पोटनिवडणुक होत आहे. अद्याप नंदुरबार जिल्ह्यात तीन जणांचे सात नामांकन दाखल करण्यात आले आहे. नंदुरबार तालुक्यातील कोळदे गटात डॉ.सुप्रिया गावीत यांनी भाजपातर्फे नामांकन दाखल केले आहे. त्यांच्या विरोधात शिवसेनेतर्फे नंदुरबार पालिकेचे उपनगराध्यक्ष रविंद्र पवार हे आज अर्ज दाखल करण्याची शक्यता आहे.
नंदुरबार तालुक्यातील कोळदा, खोंडामळी, शनिमांडळ, रनाळा, कोपर्ली या जिल्हा परिषद गटांची पोटनिवडणुक लागली आहे. कोपर्ली गटातून शिवसेनेतर्फे ऍड.राम रघुवंशी यांनी अर्ज दाखल केला आहे. तर कोळदे गटातून आ.डॉ.विजयकुमार गावीत यांची सुपूत्री डॉ.सुप्रिया गावीत यांनी भाजपातर्फे नामांकन दाखल केले आहे. त्यांच्यासमोर शिवसेनेतर्फे कोण उमेदवार राहिल. याबाबत नागरीकांमध्ये उत्सुकता होती. मिळालेल्या माहितीनुसार, कोळदे गटातून डॉ.सुप्रिया गावीत यांच्या विरोधात शिवसेनेतर्फे नंदुरबारचे उपनगराध्यक्ष रविंद्र पवार हे नामांकन दाखल करण्याची शक्यता आहे. तर कोपर्ली गटातून ऍड.राम रघुवंशी यांच्या विरोधात गावीत परिवारातील सदस्य नामांकन दाखल करण्याची शक्यता आहे. त्यामुळे कोपर्ली व कोळदे गटात काटयाची टक्कर पाहायला मिळणार आहे. उमेदवारी अर्ज माघारीनंतर चित्र स्पष्ट होणार आहे. असे असले तरी जिल्हा परिषद व पंचायत समितीच्या रिक्त जागांच्या पोटनिवडणुकीसाठी सर्वच पक्षांनी कंबर कसले आहे.
