नंदुरबार | प्रतिनिधी
गुजरात राज्यातून विसरवाडीमार्गे धुळ्याकडे तब्बल १ लाख २८ हजार लिटर बायोडिझेलची अवैध वाहतूक करणारे तीन टँकर स्थानिक गुन्हे शाखेने जप्त केले. या कारवाईत तीन टँकर चालकांना ताब्यात घेण्यात आले असून, १ कोटी २ लाख ४० हजार रुपये किमतीचे बायोडिझेल, १ कोटी १५ लाख २० हजार रुपये किमतीचे तीन टँकर आणि ३० हजार रुपये किमतीचे तीन मोबाईल असा एकूण २ कोटी १७ लाख ७० हजार रुपयांचा मुद्देमाल हस्तगत करण्यात आला आहे.
स्थानिक गुन्हे शाखेचे पोलीस निरीक्षक हेमंत पाटील यांना गोपनीय बातमीदारामार्फत गुजरात राज्यातून विसरवाडीमार्गे बायोडिझेलची अवैध वाहतूक होणार असल्याची माहिती मिळाली. त्यानंतर त्यांनी तातडीने पथक तयार करून कारवाईचे आदेश दिले.
त्यानुसार स्थानिक गुन्हे शाखेच्या पथकाने विसरवाडी पोलीस ठाण्याच्या हद्दीतील महामार्ग पोलीस मदत केंद्राजवळ सापळा लावला. रात्री साडेअकराच्या सुमारास विसरवाडीच्या दिशेने धुळ्याकडे एकापाठोपाठ येणारे पांढऱ्या रंगाचे तीन टँकर पोलिसांना दिसले. पोलिसांनी तिन्ही टँकर थांबवून चालकांकडे चौकशी केली असता त्यांनी समाधानकारक उत्तरे दिली नाहीत. त्यामुळे वाहनांची तपासणी करण्यात आली.
तपासणीदरम्यान टँकरमध्ये बायोडिझेल असल्याचा संशय आल्याने पुरवठा विभाग, नवापूर आणि नंदुरबार येथील फॉरेन्सिक पथकाच्या मदतीने तपासणी करण्यात आली. त्यात तिन्ही टँकरमधून बायोडिझेलची वाहतूक होत असल्याचे निष्पन्न झाले.
या प्रकरणी टँकर चालक बाबुलाल नरसिंगराम बिष्णोई (४९, रा. भूनिया, ता. सेंडवा, जि. बाडमेर, राजस्थान), गुमानराम रुपाराम जाट (३८, रा. दिनगड, ता. चौथान, जि. बाडमेर, राजस्थान) आणि संतोष रोधेश्याम सिंग (३६, रा. पुरा हरलाल, ता. बाह, जि. आग्रा, उत्तर प्रदेश) यांच्याविरुद्ध विसरवाडी पोलीस ठाण्यात गुन्हा दाखल करण्यात आला आहे. पुढील तपास सपोनि जयेश खलाने करीत आहेत.
ही कारवाई जिल्ह्याच्या पोलीस अधीक्षक अश्विनी सानप आणि अपर पोलीस अधीक्षक अशित कांबळे यांच्या मार्गदर्शनाखाली स्थानिक गुन्हे शाखेचे पोलीस निरीक्षक हेमंत पाटील, पोलीस उपनिरीक्षक मुकेश पवार, विकास गुंजाळ, सहायक पोलीस उपनिरीक्षक राकेश वसावे, पोलीस हवालदार मुकेश तावडे, मोहन ढमढेरे, तसेच पोलीस अंमलदार रामेश्वर चव्हाण, अभय राजपुत, मनोज महाजन, विनोद पाटील आणि रविंद्र अहिरे यांच्या पथकाने केली.
