नंदुरबार l प्रतिनिधी
शेताची मोजणी केल्यानंतर मोजणी शीट शेतकऱ्याला देण्यासाठी शेतकऱ्याकडून दहा हजाराची लाच मागत तडजोडीअंती पाच हजाराची लाच स्वीकारताना शहादा उपअधीक्षक भूमी अभिलेख कार्यालयाच्या भुकर मापकाला लाचलुचपत प्रतिबंधक विभागाच्या पथकाने रंगेहात अटक केली आहे.
तक्रारदार यांच्या मालकीची शहादा तालुक्यातील हिंगणी शिवारात गट नंबर 17 ही शेतजमीन आहे. यापूर्वी या शेताची अभिजित अर्जुन वळवी भुकर मापक , उप अधीक्षक भूमिअभिलेख कार्यालय , शहादा यांनी मोजणी केली आहे. परंतु अर्जुन वळवी यांनी शेत मोजणीचे शीट तक्रारदार यांना दिलेले नाही.
तक्रारदार यांनी त्यांच्या शेताच्या मोजणी बाबतचे शिट अभिजित अर्जुन वळवी यांच्याकडे मागितले. अभिजीत वळवी याने शेतकऱ्याकडून शेतमोजणीचे मोजणी शिट देण्याच्या मोबदल्यात प्रथम दहा हजार रुपयांची मागणी केली.
तडजोडीअंती पंचांसमक्ष पाच हजार रूपयांची मागणी केली. अभिजित वळवी याने 6 फेब्रुवारी रोजी तक्रारदार यांच्याकडून पाच हजार रुपये लाचेची रक्कम पंचांसमक्ष स्विकारली आहे. याबाबत शहादा पोलीस ठाण्यात गुन्हा दाखल करण्याची प्रक्रिया चालू आहे.
सदरची कारवाई लाचलुचपत प्रतिबंधक विभागाचे
पोलीस उपअधीक्षक राकेश चौधरी,पोलीस निरीक्षक नेहा सूर्यवंशी यांच्या मार्गदर्शनाखाली
पोनि नरेंद्र खैरनार,विलास पाटील , पोहवा हेमंत महाले , पोहवा विजय ठाकरे,देवराम गावित,संदीप खंडारे, जितेंद्र महाले , पोहवा नरेंद्र पाटील, सुभाष पावरा यांच्या पथकाने केली आहे.
