नंदुरबार l प्रतिनिधी-
गेल्या तेरा वर्षापासून जिभाऊ करंडक राज्यस्तरीय एकांकिका स्पर्धेचे सातत्यपूर्ण आयोजन होत आहे. यंदा या स्पर्धेचे १४ वे वर्ष आहे. या स्पर्धेच्या माध्यमातून नंदुरबार जिल्ह्यातील कलावंतांना व रसिकांना विविध नाट्य अविष्कार अनुभवयास मिळत असतात. तसेच या स्पर्धेच्या माध्यमातून जिल्ह्यात नाट्यकलावंत व नाट्यतंत्रज्ञ देखील तयार होत आहेत असे प्रतिपादन आयोजन समितीचे सदस्य तथा नाट्यकर्मी मनोज सोनार यांनी केले. ते येथील छत्रपती शिवाजी महाराज नाट्यगृहाच्या प्रांगणात जिभाऊ करंडक राज्यस्तरीय एकांकिका स्पर्धेच्या आयोजन बैठकीत बोलत होते.
स्पर्धेचे आयोजन गाडगेबाबा शैक्षणिक व सांस्कृतिक सेवा मंडळ, शिंदे यांच्या तर्फे राज्यपुरस्कृत शिक्षक जयदेव लिंबा पेंढारकर तथा जिभाऊ यांच्या स्मरणार्थ करण्यात येते. या स्पर्धेत राज्यभरातील नाट्यसंस्था व महाविद्यालये सहभागी होऊन आपला नाट्याविष्कार सादर करीत असतात. सदर बैठकीत जिभाऊ करंडक स्पर्धेत सहभागी होणारे संघ व कलावंत स्पर्धकांचे नियोजन याबाबत चर्चा करण्यात आली. बैठकीदरम्यान नाट्यकर्मी नागसेन पेंढारकर यांनी स्पर्धेच्या यशस्वी आयोजनाबाबत आपले विचार मांडले. तसेच या वर्षी नंदुरबार जिल्ह्यातुन जास्तीत जास्त महाविद्यालय व विविध नाट्यसंस्था यांचा सहभाग स्पर्धेच्या दृष्टीने महत्वाचा आहे.
जिभाऊ करंडक ही स्पर्धा महाराष्ट्रातील प्रमुख एकांकिका स्पर्धेपैकी एक स्पर्धा आहे. या जिभाऊ करंडकमुळे नंदुरबार जिल्ह्यात नाट्य चळवळ जोमाने उभी राहिली असून जिभाऊ करंडक च्या दरम्यान नंदुरबार जिल्ह्यातील नाट्यसंस्था देखील सहभागी होतील असा विश्वास देखील नागसेन पेंढारकर यांनी व्यक्त केला. जिभाऊ करंडकच्या या बैठकीत नाट्यकर्मी तुषार ठाकरे, विश्व हिंद धर्म सेवा संस्थेचे अध्यक्ष कुणाल वसईकर यांनी देखील जिभाऊ करंडकच्या नियोजनाबाबत आपले मत व्यक्त करीत जिभाऊ करंडक यशस्वी होण्याबाबतचा विश्वास व्यक्त केला. जिभाऊ करंडक च्या या बैठकीत गिरीश वसावे, रत्नदीप पवार, राहुल खेडकर, आशिष खैरनार, सागर कदम, चिदानंद तांबोळी आदी उपस्थित होते.
