नंदुरबार l प्रतिनिधी-
काँग्रेसचे ज्येष्ठ नेते माजी मंत्री रोहिदास पाटील (वय ८४) यांचे वृद्धापकाळाने शुक्रवारी सकाळी ११ वाजता येथे निधन झाले.
त्यांची अंत्ययात्रा शनिवार, २८ रोजी सकाळी ११ वाजता नेहरू हौसिंग सोसायटी, देवपूर येथील निवासस्थानापासून निघेल आणि देवपुरातील एसएसव्हीपीएस महाविद्यालयाच्या मैदानाठिकाणी त्यांच्यावर शासकीय इतमामात अंत्यसंस्कार करण्यात येणार आहेत. तत्पूर्वी, त्यांचे अंत्यदर्शन शनिवारी सकाळी ७ ते १० वाजेपर्यंत नेहरू हौसिंग सोसायटीतील सावित्री सभागृहात घेता येणार आहे. महाराष्ट्र प्रदेश काँग्रेसचे कार्याध्यक्ष आणि धुळे ग्रामीणचे आमदार कुणाल पाटील यांचे ते वडील होत. त्यांच्या पश्चात दोन मुले, मुलगी, सुना, नातवंडे, असा परिवार आहे.
गेल्या वर्षभरापासून त्यांची प्रकृती खालावली होती. काँग्रेसचे नेते राहुल गांधी यांनी भारत जोडो यात्रेच्या दुसऱ्या टप्प्यात धुळे येथून जात असताना रोहिदास दाजी यांची त्यांच्या निवासस्थानी भेट घेत प्रकृतीची विचारपूस केली होती.