नंदुरबार l प्रतिनिधी
शिवसेनेचे संपर्कप्रमुख तथा माजी आमदार चंद्रकांत रघुवंशी यांच्या मध्यस्थीने कंत्राटी तत्त्वावरील सफाई कामगारांनी संपातून माघार घेत आज गुरुवार पासून घरोघरी कचरा संकलनाचे कामकाज पूर्ववत सुरू करण्याचे कर्मचाऱ्यांनी मान्य केले आहे.
शहरातील एका दांपत्याने कंत्राटी तत्त्वावरील सफाई कर्मचाऱ्यास मारहाण केल्याच्या निषेधार्थ गेल्या ३ दिवसांपासून सफाई कामगारांनी संप पुकारला होता.त्यामुळे शहरात घरोघरी कचरा संकलन होत नव्हता.स्वच्छतेच्या प्रश्न निर्माण झाल्याने अखेर शिवसेनेचे संपर्कप्रमुख तथा माजी आमदार चंद्रकांत रघुवंशी यांनी संपात सहभागी झालेल्या कामगारांशी भेट घेत चर्चा केली. यावेळी कामगारांमध्ये आणि माजी आ.चंद्रकांत रघुवंशी यांच्यात साधारणता पाऊण तास चर्चा होऊन अखेर कर्मचाऱ्यांनी संपातून माघारी घेत आज गुरुवारपासून कामकाज सुरू करणार असल्याची ग्वाही दिली.
कामगारांवर अन्याय होऊ देणार नाही; माजी आ.चंद्रकांत रघुवंशी
यावेळी शिवसेनेचे नेते तथा माजी आमदार चंद्रकांत रघुवंशी म्हणाले,शहराच्या स्वच्छतेत सफाई कामगारांच्या मोठा वाटा आहे.कोरोना कालावधीत स्वच्छता कामगारांनी जीवाची पर्वा न करता अहोरात्र मेहनत घेतलेली आहे. कामगारांवर कुठलाही अन्याय होऊ देणार असे त्यांनी सांगितले. यावेळी मुख्याधिकारी अमोल बागुल, माजी उपनगराध्यक्ष कुणाल वसावे,माजी सभापती कैलास पाटील,माजी नगरसेवक परवेज खान,माजी नगरसेवक रवींद्र पवार,सामाजिक कार्यकर्ते मोहितसिंग राजपूत उपस्थित होते.
पालिका सभागृहात सायंकाळी बैठक
शिवसेनेचे नेते तथा माजी आ.चंद्रकांत रघुवंशी यांनी सफाई कामगारांची भेट घेतली असता कामगारांनी समस्या मांडत मागण्या लावून धरल्या.स्वच्छता कर्मचाऱ्यांना ओळखपत्र देण्यात यावे,पगार वाढ करावी अशा मागण्यांच्या समावेश होता.दरम्यान,माजी आ.रघुवंशी यांनी आज गुरुवारी स्व.अटल बिहारी वाजपेयी सभागृहात सायंकाळी पाच वाजता बैठक बोलावली आहे.
