नंदुरबार l प्रतिनिधधी
युवक-युवतींनी समाजकार्यात आपले योगदान द्यावे, युवारंग फाऊंडेशन व हिरकणी फाऊंडेशन व्यासपीठाचा पुरेपूर वापर करुन विविध उपक्रमात सक्रीय सहभाग नोंदवावा, असे प्रतिपादन ज्येष्ठ साहित्यीक पितांबर सरोदे यांनी केले. ते येथील युवारंग फाऊंडेशन व हिरकणी फाऊंडेश यांच्या संयुक्त गौरव समारंभ वर्धापन दिन कार्यक्रमात बोलत होते
यावेळी कार्यक्रमाच्या अध्यक्षस्थानी कर सहाय्यक निरीक्षक किशोर निकम तर प्रमुख पाहुणे म्हणून शहर पोलीस स्टेशनचे एपीआय चंद्रकांत पाटील, पीएसआय श्री.गुंजाळ वनपरिक्षेत्राचे वनपाल युवराज भाबड आदी उपस्थित होते. कार्यक्रमाची सुरुवात भारतमाता प्रतिमापूजन व युवारंग फाउंडेशन संस्थापक अध्यक्ष कै.जितेंद्र लुळे यांच्या प्रतिमेस पुष्पहार अर्पण करून झाली.
प्रास्ताविक हिरकणी फाऊंडेशनच्या अध्यक्षा चेतना गोस्वामी यांनी केले. किशोर निकम यांच्या हस्ते ज्येष्ठ साहित्यिक पितांबर सरोदे यांना युवारंग जीवनगौरव पुरस्कार देवून गौरविण्यात आले. तसेच चंद्रकांत पाटील यांच्या हस्ते भामरे स्पर्धा परीक्षा मार्गदर्शन केंद्राचे संचालक प्रा.युवराज भामरे यांना युवारंग ज्ञानदा व समाजकार्य पुरस्कार देवून गौरविण्यात आले. चंद्रकांत पाटील यांनी शिकाल तर टिकाल असे शिक्षणाचे महत्त्व पटवून दिले. युवराज भाबड यांनी पर्यावरणाचे रक्षण व वृक्ष संवर्धन करावे असे युवक व युवतींना मार्गदर्शन केले.
तर किशोर निकम यांनी कै.जितेंद्र लुळे यांच्या विषयी बोलताना जो आवडे सर्वांना तोची आवडे देवाला असे म्हणत स्पर्धा परीक्षेचे मार्गदर्शन केले. यावेळी भामरे स्पर्धा परीक्षा मार्गदर्शन केंद्रातील बीएसएफमध्ये निवड झालेल्या चेतन बोरसे व गोपाल गिरासे या विद्यार्थ्यांचा सत्कार करण्यात आला. सूत्रसंचालन संगीता वाघ यांनी केले व आभार युवारंग फाऊंडेशनचे सचिव राहुल शिंदे यांनी मानले. कार्यक्रम यशस्वीतेसाठी देवेंद्र कासार, ऋषिकेश मंडलिक, प्रणव पवार, उज्वला गावित, निता मराठे यांनी परिश्रम घेतले.
