नंदूरबार l प्रतिनिधी
नंदुरबार जिल्हा परिषद अध्यक्ष डॉ.सुप्रिया गावित यांनी महाराष्ट्र राज्याचे उपमुख्यमंत्री अजित पवार यांना निवेदन देऊन महाराष्ट्र राज्यातील सर्व जिल्हा परिषद अध्यक्षांचे वाहन खरेदीची मर्यादा २० लक्ष करण्याची मागणीची उपमुख्यमंत्री यांनी दखल घेत
मागणी तातडीने पुर्ण करण्याचे आदेश दिले. याआधी वाहन खरेदीची मर्यादा १२ लक्ष इतकी होती. परंतु महाराष्ट्रातील जिल्ह्यांची भौगोलिक परिस्थिती पाहता जिल्हा परिषद अध्यक्षांना जिल्ह्यातील दुर्गम भागातील दौरे तसेच प्रशासकीय यंत्रणावरील संनियत्रण ठेवणेसाठी आवश्यक शासकीय दौऱ्यांची व्याप्ती लक्षात घेता तसेच सर्व जिल्ह्यांची विकास कामे व जनतेच्या समस्या तातडीने सोडविण्यासाठी मोठ्या प्रमाणावर प्रवास करावा लागत असतो.
या सर्व बाबी लक्षात घेता डॉ. सुप्रिया गावित यांच्यातर्फे राज्याचे आदिवासी विकास मंत्री विजयकुमार गावित यांच्या समक्ष जिल्हा परिषद अध्यक्षांच्या वाहन खरेदीची मर्यादा रक्कम २० लक्ष करण्याबाबतचे निवेदन महाराष्ट्र राज्याचे उपमुख्यमंत्री यांना देण्यात आले. सदर निवेदनाबाबत राज्याचे उपमुख्यमंत्री अजित पवार यांनी सकारात्मक प्रतिसाद देत महाराष्ट्र राज्यातील सर्व जिल्हा परिषद अध्यक्षांच्या वाहन खरेदीची मर्यादा १२ लाखावरून २० लक्ष करण्याचे आश्वासन दिले.
सदर मागणी तातडीने पुर्ण करण्या बाबत उपमुख्य मंत्र्यांनी आदेश दिले. याप्रसंगी महाराष्ट्रातील सर्व जिल्हा परिषद अध्यक्षांनी डॉ. सुप्रिया गावित यांचे आभार मानले.
