नंदुरबार l प्रतिनिधी
जिल्ह्यात दूध भेसळ रोखण्यासाठी व भेसळ करणाऱ्यांवर दंडात्मक कारवाई करण्यासाठी पोलीस, अन्न व औषध प्रशासन तसेच जिल्हा दुग्धव्यवसाय विकास अधिकारी यांनी समन्वयातून संयुक्त कारवाई करावी, असे निर्देश अपर जिल्हाधिकारी धनंजय गोगटे यांनी दिले.
जिल्ह्यातील दूध भेसळ रोखण्यासाठी नुकतीच जिल्हास्तरीय दूध भेसळ नियंत्रण समिती समितीची बैठक अपर जिल्हाधिकारी धनंजय गोगटे यांच्या अध्यक्षतेखाली संपन्न झाली. यावेळी पोलीस उपअधिक्षक विश्वास वळवी, अन्न व औषध प्रशासन चे सहायक आयुक्त डी. डी. तांबोळी, सहायक आयुक्त पशुसंवर्धन डॉ. एम. व्ही. पावरा, जिल्हा दुग्धव्यवसाय विकास अधिकारी डॉ. अमित रमेश पाटील, वैध मापन शास्त्र निरीक्षक भुषण हारोडे, विस्तार संकलक, प्रितेश गोंधळ हे उपस्थित होते.
यावेळी श्री. गोगटे म्हणाले, दूध भेसळ रोखण्यासाठी नियोजनबद्ध कारवाई करावी, ही कारवाई करताना गोपनीयतेचे पालन करावे दुग्धजन्य मिठाई, पनीर, चिज या पदार्थांची जेथे विक्री होते तेथे व इतर त्याठिकाणी तपासणी करावी. तपासणीत जेथे भेसळ होत असल्याचे आढळून आल्यास भेसळ करणाऱ्यांविरुद्ध दंडात्मक कारवाई करावी असेही निर्देश त्यांनी यावेळी दिले.
वजन-मापांची पडताळणी व मुद्रांकन नियमित करणे आवश्यक असून इलेक्ट्रॉनिक तोलन उपकरण प्रत्येक वर्षाला आणि वजने, मापे दोन वर्षातून एकदा पडताळणी व मुद्रांकन करावित. ज्यांनी अशी पडताळणी व मुद्रांकन केले नसतील त्यांच्यावर कारवाई करण्याबाबत यावेळी समितीमार्फत निर्णय घेण्यात आला.
जिल्ह्यात दूध व दुग्धजन्य पदार्थ भेसळ शोधमोहिमेत पथकामार्फत धाडसत्राच्या माध्यमातून कारवाई करण्यात येणार असून या धाडसत्रात दुध व दुग्धजन्य पदार्थ यामध्ये भेसळ आढळल्यास संबंधितांवर गुन्हे दाखल करावेत,असा निर्णयही यावेळी बैठकीत घेण्यात आला आहे.
