नंदुरबार l प्रतिनिधी
नंदुरबार-येथील मातृवंदना प्रतिष्ठानतर्फे शिवण नदी पात्रातील विसर्जित मूर्तींसह निर्माल्य पाण्यातून काढत नदीची स्वच्छता केली. श्री गणेशाची अनोखी पर्यावरणपूरक सेवा करत शिवण नदीपात्र स्वच्छ राखण्यासाठी अनोखा श्रमदान यज्ञ करण्याच्यादृष्टीने मातृवंदना प्रतिष्ठानतर्फे हा उपक्रम राबविण्यात आला. यावेळी युवकांनी श्रमदानाचा संदेश दिला.
नवापूर रस्त्यालगत शिवण नदीच्या पात्रात शहरातील परिसरातील नागरीक घरगुती तसेच सार्वजनिक गणेश मंडळाच्या मूर्तींचे मोठ्या प्रमाणात विसर्जन करण्यात येत असते. यामुळे अस्वच्छतेमुळे शिवण नदीचे अस्तित्त्व धोक्यात आल्याचे जाणवते. पीओपीच्या गणेश मूर्ती पाण्यात लवकर विरगळत नसल्यामुळे मूर्तीचे विटंबन होत असते. याचेच सामाजिक भान ठेवून मातृवंदना प्रतिष्ठानच्या सदस्यांनी नदी पात्र स्वच्छ करत नागरीकांनी आपली नदी स्वच्छ ठेवण्यासाठी पुढे येण्याचे आवाहन केले होते. यावेळी मातृवंदना प्रतिष्ठाचे अध्यक्ष जितेंद्र माळी, सचिव जगदीश वंजारी, शिवाजी माळी, भुषण माळी, रोहित जैन, हेमंत माळी, ओम माळी, राहुल माळी आदींनी श्रमदान केले. तसेच यापुढे पर्यावरणपूरक गणेशमूर्तीची स्थापन करुन आपल्या परिसरातील नदीपात्रांचे संरक्षण करावे, असे आवाहन प्रतिष्ठानतर्फे करण्यात आले.
