नंदूरबार l प्रतिनिधी
नंदूरबार येथे खासदार अमोल कोल्हे यांचे पी. ए. यांचे नाव सांगून पोलिसांना अपघाताबाबतची खोटी माहीती देवून पोलिसांची आर्थिक फसवणूक केल्याप्रकरणी एका विरुद्ध गुन्हा दाखल करण्यात आला आहे.
याबाबत अधिक माहिती अशी की, दि. 1 जून 2023 रोजी पोलीस अधीक्षक पी. आर. पाटील यांना त्यांचे मोबाईल क्रमांकावर अज्ञात मोबाईल क्रमांक 09373939113 यावरुन काहीतरी काम असल्याचा रात्री ११ वा. एस.एम.एस आला. त्यानी तात्काळ त्यांचे जनसंपर्क अधिकारी पोलीस उप निरीक्षक हेमंत मोहीते यांना मदत करण्यास सांगीतले. त्याअन्वये पी.एस.आय मोहिते यांनी तात्काळ नमुद मोबाईल क्रमांकावर कॉल केला असता, कॉलर यांनी त्यांचे नाव प्रबोध चंद्र सावंत असे सांगून ते खा.अमोल कोल्हे यांचे स्विय सहाय्यक असल्याबाबत कळविले व त्यांच्या मतदार संघातील लोकांच्या एका वाहनाचा शहादा येथे अपघात झाला असल्याचे सांगून त्यांना तातडीने मदत करावी म्हणून सांगितले. तसेच त्यांनी दिलेला मोबाईल
क्र.09834395809 यावर पी.एस.आय मोहिते यांनी तात्काळ संपर्क केला असता सदर कॉलर याने त्याचे नाव रविकांत मधुकर फसाळे असे कळवून त्यांच्या बोलेरो वाहनाचा शहादा येथे अपघात होवून 4 लोक मयत झाले असून 7 ते 8 लोक जखमी असुन त्यांच्यावर नंदुरबार येथे शासकीय रुग्णालयात उपचार चालू आहेत असे सांगितले. त्याबाबत नियंत्रण कक्ष यानी तातडीची मदत होण्याकामी माहिती घेतली असता असा अपघात झाला नसल्याचे समजले. त्यानंतर सदर मोबाईल क्र. 09834395809 यांनी पुन्हा पी.एस.आय मोहिते यांना कॉल करून त्यांना तात्काळ अम्ब्युलन्सने शिवाजीनगर पुणे येथे जाणे असल्याने वाहनात डिझेलसाठी 7 हजार रुपयांची आवश्यकता असल्याचे सांगीतले.
ही बाब खा. यांचे पी. ए. प्रबोध चंद्र सावंत यांना सांगितली तसेच पोलीस मदत देत असल्याचे सांगितले. त्यानंतर पुन्हा रविकांत मधुकर फसाळे यांनी पी.एस.आय मोहिते यांना थोड्या वेळाने पुन्हा कॉल करून सांगितले की, सकाळपासून काहीही खाल्ले नाही उपाशी आहोत, कृपया आम्हाला जेवणासाठी 2 हजार रुपयांची मदत करावी, जेणेकरून ते प्रवासादरम्यान काहीतरी जेवण करतील.
पी.एस.आय मोहिते यानी खासदार यांचे पी. ए. प्रबोध चंद्र सावंत यांना विचारले. त्यांनी अपरात्र असल्याने व दूर प्रवास करणे असल्याने तसेच खा. अमोल कोल्हे यांचा मदत करण्याबाबतचा निरोप आहे असे सांगितले. पी.एस.आय मोहिते यांनी माणूसकीच्या नात्याने कॉलर नाम मोबाईल क्र. 09834395809 धारक रविकांत मधुकर फसाळे याचे फोन पे अकाऊंटवर 1 हजार रुपयांची मदत पाठविली.
आज सकाळी दि. 2 जुन रोजी पी.एस.आय मोहिते यांनी नियंत्रण कक्षामार्फत खात्री केली असता अशा प्रकारची अपघाताची घटना ही नंदुरबार जिल्हा हद्दीत तसेच आजुबाजुच्या जिल्ह्यात देखील घडलेली नसल्याचे समजले. त्यामुळे अनोळखी मोबाईल क्र.09834395809 धारक रविकांत मधुकर फसाळे यांनी खासदार अमोल कोल्हे यांचे पी. ए. प्रबोध चंद्र सावंत यांचे नाव सांगून पोलिसांना अपघाताबाबतची खोटी माहीती देवून पोलिसांची आर्थिक फसवणूक केली.
तसेच पोलीस खात्याला अपघाताबाबत खोटी माहीती देवून विनाकारण कामाला लावून शासकीय कामकाजाचा वेळ वाया घालवला आहे. याबाबत नंदुरबार शहर पोलिस ठाण्यात भादवी कलम भा.द.वि. कलम 420, 182 सह माहीती तंत्रज्ञान अधिनियम 2000 चे कलम 66(ड) अन्वये गुन्हा नोंद करण्यात आला आहे.
