नंदुरबार l प्रतिनिधी
नंदुरबार येथील तहसिल कार्यालयातील खाजगी लेखनिक व संगणक ऑपरेटर यांनी रेशनकार्ड बनविण्यासाठी एक हजार रुपये लाचेची रक्कम स्विकारत असतांना लाचलुचपत प्रतिबंधक विभागाच्या पथकाला रंगेहात सापडल्याने दोघा संशयितांना ताब्यात घेण्यात आले. याप्रकरणी काल रात्री उशिरापर्यंत कारवाई सुरु होती.
याबाबत अधिक माहिती अशी की, तालुक्यातील तक्रारदार यांनी ११ नोव्हेंबर २०२२ रोजी नवीन रेशनकार्ड बनविण्यासाठी नंदुरबार तहसील कार्यालय येथे अर्ज व कागदपत्रे बनविली होती. यावेळी खासगी लेखनिक वसीम बशीर पिंजारी याने तक्रारदारास रेशनकार्ड बनवून देणार असल्याचे सांगितले होते. याबाबत तक्रारदाराने वेळोवेळी पाठपुरावा करुनही रेशनकार्ड मिळाले नाही.
दि.९ मे रोजी वसीम पिंजारी याने तक्रारदाराकडे रेशनकार्ड बनवण्यासाठी १ हजार रुपये लाचेची मागणी केली. याबाबत तक्रारदाराने लाच लूचपत प्रतिबंधक विभाग नंदुरबार येथे तक्रार केली. त्यानंतर १६ व काल दि.१७ मे रोजी पंचासमक्ष केलेल्या पडताळणीत संशयित वसीम याने स्वत:साठी ७०० रुपये व संगणक ऑपरेटर विशाल शिशूपाल घुगे याच्यासाठी ३०० रुपये अशी १ हजार रुपये लाचेची मागणी केली. काल खासगी इसम वसीम पिंजारी यास तहसील कार्यालय येथे पंच साक्षीदारांसमक्ष १ हजार रुपये लाच घेतांना रंगेहात पकडण्यात आले आहे.
दोघा संशयितांना एसीबीच्या पथकाने ताब्यात घेतले आहे. सदरची कारवाई सापळा पर्यवेक्षण अधिकारी पोलिस उपअधिक्षक राकेश चौधरी, सापळा व तपास अधिकारी पोलिस निरीक्षक माधवी वाघ तसेच पोलिस निरीक्षक समाधान वाघ, पोहेकॉ.विलास पाटील, विजय ठाकरे, ज्योती पाटील, पोना.अमोल मराठेे, मनोज अहिरे, संदिप नावाडेकर, देवराम गावित, जितेंद्र महाले यांच्या पथकाने केली आहे.
