पोलीसांच्या तत्परतेमुळे लंपास झालेल्या दोन दुचाकी १५ मिनिटात सापडल्या

नंदुरबार | प्रतिनिधी
शहरातील धुळे रस्त्यावरील तलाठी कॉलनी परिसरातील एका हॉस्पिटल परिसरातून व कोकणीहिल परिसरातील एका बँकेच्या एटीएमजवळून दुचाकी लंपास झाल्याचे शहर वाहतूक शाखेला कळविण्यात आले.शहर वाहतूक पोलीस निरीक्षक अविनाश मोरे यांनी तपासाची चक्रे गतिमान करत व्हॉटस् ऍप गृपवर दोन्ही क्रमांकाच्या दुचाकींचे क्रमांक टाकल्यानंतर अवघ्या १५ मिनिटात दोन्ही दुचाकी आढळून आल्याने दुचाकीमालकांनी समाधान व्यक्त करत शहर वाहतूक शाखेच्या कामगिरीचे कौतुक केले आहे.

नंदुरबार येथील नितेश नाथजोगी यांची दुचाकी क्र.(एमएच ३९ के.२२७७) घेवून त्यांचे मित्र कोकणी हिल परिसरातील एचडीएफसी बँकेजवळ गेले होते.यावेळी तिथून परततांना त्यांनी दुचाकी तेथेच सोडून नजरचुकीने शेजारी असणारी दुचाकी क्र.(एमएच ३९ एए २७२१) घेवून ते परतले.यामुळे संबंधित दुचाकीस्वार यांनी एटीएम बाहेर आले असता त्यांना त्यांची दुचाकी आढळून न आल्याने त्यांनी तात्काळ शहर वाहतूक शाखेशी संपर्क साधला.यादरम्यान, श्री.नाथजोगी यांची दुचाकी क्र.(एमएच ३९ के.२२७७) कोकणी हिल परिसरातच राहिल्याने दुचाकी चोरीला गेल्याची समजूत करत त्यांनीही तात्काळ शहर वाहतूक शाखेशी संपर्क केला.यामुळे पोलीस निरीक्षक अविनाश मोरे यांनी तात्काळ दखल घेवून दोन्ही दुचाकींचे क्रमांक गृपवर टाकून दोन्ही ठिकाणी पोलीस कर्मचारी रवाना केले.यातील दोन्ही नमुद दुचाकींपैकी (एमएच ३९ के.२२७७) कोकणी हिल परिसर तर (एमएच ३९ के.२२७७)तलाठी कॉलनी परिसरात आढळून आली.दोन्ही दुचाकी अवघ्या १५ मिनिटातच आढळून आल्याने दोन्ही दुचाकी मालकांचा जीवात जीव आला. पोलीस निरीक्षक मोरे यांनी तात्काळ दखल घेतल्याने दोन्ही दुचाकी परत मिळाल्याने त्यांच्या तत्परतेचे जनसामान्यातून कौतुक करण्यात येत आहे.