शहादा l प्रतिनिधी
येथील पूज्य साने गुरूजी विद्या प्रसारक मंडळ संचलित कृषी महाविद्यालयात डॉ. बाबासाहेब आंबेडकर यांच्या जयंतीनिमित्त समता पर्व अभियान अंतर्गत सामाजिक न्याय विभाग व डॉ.बाबासाहेब आंबेडकर संशोधन व प्रशिक्षण संस्था (बार्टी) च्या वतीने समता रॅली व स्वच्छता अभियान राबविण्यात आले.
समाज कल्याण सचिव सुमित भांगे, बार्टीचे महासंचालक सुनिल वारे व विभाग प्रमुख (विस्तार व सेवा) डॉ. सत्येंद्रनाथ चव्हाण यांच्या संकल्पनेतुन समाज कल्याण सहाय्यक आयुक्त देविदास नांदगावकर यांच्या मार्गदर्शनाखाली सर्वत्र विविध कार्यक्रम आयोजित करण्यात आले आहेत.येथील पूज्य साने गुरुजी विद्या प्रसारक मंडळाच्या के.व्ही.पटेल कृषी महाविद्यालय शहादा येथे विद्यार्थ्यांच्या सहभागाने समता रॅली व स्वच्छता अभियान असे उपक्रम राबविले. शहादा समतादुत (तालुका समन्वयक) जयश्री कढरे व करणकाळे हिम्मत यांनी प्रबोधनातून समता रॅली व स्वच्छता विषयी मार्गर्शन करून विद्यार्थी व विद्यार्थिनी आणि शिक्षक वृंद यांच्या सहयोगाने कृषि महाविद्यालय ते विद्याविहार कॉलनी पर्यंत समता रॅली काढण्यात आली.
डॉ. बाबासाहेब आंबेडकर, संविधान व मंडळाचे संस्थापक आण्णासाहेब पी.के.पाटील यांच्या नावाने घोषणा देऊन रॅली काढण्यात आली. तदनंतर विद्याविहार कॉलनीत विद्यार्थ्यांच्या सहभागाने स्वच्छता अभियान राबविण्यात आले.समता पर्व साजरा करण्यात आला. महाविद्यालयातील समान संधी केंद्राचे समन्वयक प्रा.रुपेश पाटील यांनी प्रस्तावना करून परिचय दिला. या सर्व कार्यक्रमास प्राचार्य डॉ. प्रकाश पटेल व प्राध्यापक,शिक्षकेतर वृंद यांचे विशेष सहकार्य लाभले.
