नंदुरबार l प्रतिनिधी
साऱ्या जगाला विश्व बंधुत्व आणि शांततेचा संदेश देत हजारो वर्षापासून प्रेरणादायी ठरलेले भगवान महावीर यांच्या जयंतीनिमित्त सोमवारी नंदुरबार येथील दिगंबर जैन समूहातर्फे मिरवणुकीसह विविध धार्मिक उपक्रम झाले.
माणिक चौकातील दिगंबर जैन मंदिरापासून सजवलेल्या रथातून भगवान महावीर यांच्या मूर्तीची वाजत गाजत मिरवणूक काढण्यात आली.सर्वप्रथम मंदिरात सकाळी दुग्धाभिषेक करण्यात आला.माणिक चौकातून तूप बाजार, छत्रपती शिवाजी चौक, जळका बाजार, सराफ बाजार, सोनार खुंट, हाट दरवाजा, गांधी चौक, अहिल्याबाई विहिरमार्गे जैन मंदिरामध्ये समारोप झाला.
मिरवणुकी दरम्यान विजय अजमेरा यांनी भगवान महावीर यांचे भक्तीगीत सादर केले.यावेळी महिला, पुरुष, युवती भक्ती गीतांवर तल्लीन होऊन नाचत होते.नमो अरीहंण नम.. नमो सिद्धांण… महावीर भगवान की जय… अशा घोषणा देऊन भक्तिमय वातावरण निर्माण झाले होते.
दरम्यान मिरवणूक समाप्तीनंतर माणिक चौकात सुशीलालक्ष्मी बाबुलाल जैन यांच्या स्मरणार्थ अमित जैन परिवारातर्फे भाविकांना दुध कोल्ड्रिंक्स वाटप करण्यात आले.त्यानंतर मंदिर परिसरात हातमागापासून निर्मित खादी वस्त्राच्या प्रदर्शनाचे उद्घाटन करण्यात आले.उद्योजक पारस मोदी, पारसमल खिंवसरा यांच्या हस्ते दीप प्रज्वलन व प्रतिमा अनावरण करण्यात आले.भगवान महावीर जयंती उत्सव यशस्वीतेसाठी दिगंबर जैन सोशल फेडरेशनचे महाराष्ट्र विभागीयअध्यक्ष सुरेश जैन, पदम पाटोदी,महेंद्र झांझरी,नेमीचंद जैन, प्रा. सुभाष जैन सौ.संगीता झांझरी,सौ.अजंली अजमेरा, पवन जैन, महेंद्र जैन, संजय जैन, चेतन जैन,मयुर जैन, आदीसह दिगंबर जैन समाज बांधवांनी परीश्रम घेतले.दरम्यान मिरवणूक मार्गावर शहर पोलीस ठाण्याचे पोलीस उपनिरीक्षक सागर आहेर,सहाय्यक पोलीस निरीक्षक नंदा पाटील, हवालदार सुनील मोरे, नरेंद्र देवराज, पो.ना. संपत वसावे, प्रवीण वसावे,यांनी बंदोबस्त ठेवला.
