नंदुरबार l प्रतिनिधी
महाराष्ट्र राज्य माध्यमिक व उच्च माध्यमिक शिक्षण मंडळातर्फे 16 सप्टेंबर ते 11 ऑक्टोंबर 2021 पर्यंत उच्च माध्यमिक शालांत परीक्षा तसेच 22 सप्टेंबर ते 8 ऑक्टोंबर 2021 पर्यत माध्यमिक शालांत परीक्षा घेण्यात येणार असल्याने परीक्षा केंद्राच्या ठिकाणी गैरप्रकार होऊ नये व त्याठिकाणी शांतता व सुव्यवस्थेस बाधा निर्माण होऊ नये यासाठी खबरदारीचे उपाय म्हणून जिल्हादंडाधिकारी मनीषा खत्री यांनी फौजदारी प्रक्रिया संहिता 1973 चे कलम 144 (2) नुसार परीक्षा केंद्राच्या 200 मीटर परिसरात प्रवेशास बंदीचे आदेशीत केले आहे.
श्रीमती डी.आर हायस्कुल ॲण्ड ज्युनिअर कॉलेज नंदुरबार, वसंतराव नाईक माध्यमिक व उच्च माध्यमिक विद्यालय शहादा, न्यु इंग्लिश स्कुल व ज्यु.कॉलेज अक्कलकुवा, श्रीमती पी.ए.सोढा सार्वजनिक हायस्कुल व कनिष्ठ महाविद्यालय नवापुर अशा 4 उपकेंद्रावर इयत्ता 12 वी परीक्षा घेण्यात येणार आहे.
यशवंत विद्यालय खोडाईमाता रोड, नंदुरबार व म्युनिसिपल न्यु इंग्लिश स्कुल, शहादा अशा 2 उपकेंद्रावर इयत्ता 10 वीची परीक्षा घेण्यात येणार आहे.
सदर परीक्षा केंद्राच्या 200 मीटर परिसरात 16 सप्टेंबर ते 11ऑक्टोंबर 2021 या कालावधीत सकाळी 9 वाजेपासून ते संध्याकाळी 6 वाजेपर्यंत कोणीही प्रवेश करु नये. सदरचे आदेश परिक्षार्थी, नियुक्त कर्मचारी, अधिकारी, पोलीस, होमगार्ड यांचेसाठी लागू होणार नाही. तसेच परीक्षा केंद्राच्या जवळच्या 200 मीटर परिसरातील सर्व सार्वजनिक टेलीफोन, एस.टी.डी, आय.एस.डी, फॅक्स केंद्र, झेरॉक्स दुकाने, कॉम्प्युटर दुकाने व ध्वनीक्षेपक परीक्षेच्या कालावधीत बंद ठेवण्यात यावेत, असे ही आदेशात नमूद करण्यात आले आहे.
