धडगाव l प्रतिनिधी
मागील आठवड्यात मोलगी येथील निंबीपाडा ता. अक्कलकुवा येथे उमटी येथील भिमसिंग तडवी या युवकाचा मृतदेह आढळून आला होता. याप्रकरणी अपघाती मृत्यू झाल्याची नोंद करण्यात आली. परंतु हा अपघात नसल्याचे सांगत सखोल चौकशी करण्याची मागणी मयताच्या नातेवाईकांनी आदिवासी विकास मंत्री, पोलीस अधिक्षक,तहसिलदारांना निवेदनाद्वारे केली आहे.
निवेदनात उमटी ता. अक्कलकुवा येथील 38 वर्षीय भिमसिंग गोरजी तडवी हा युवक दि. 25 डिसेंबर रोजी मोलगी येथे बाजार तथा खाजगी कामानिमित्त गेला होता. त्याचा काही सामान खाजगी प्रवासी वाहनाने पाठवून तो त्याच्या दुचाकीने मोलगीहुन गावाकडे परतला होता. परंतु तो निंबीपाडा ता. अक्कलकुवा येथील पेट्रोल पंपजवळ मुख्य रस्त्यावर मृतावस्थेत आढळून आला.
याप्रकरणी अपघाती मृत्यूची नोंदही पोलीसात करण्यात आली. या घटनेप्रकरणी त्याच्या नातेवाईकांनी संशय व्यक्त केला. हा अपघात नसून घातपात असल्याचे म्हणत त्यांनी सखोल चौकशीची मागणी पोलीस अधिक्षकांकडे केली होती.परंतू चौकशी समाधानकारक होत नसल्याचा आरोप करत नातेवाईक येत्या 3 फेब्रुवारी पोलिस स्टेशन मोलगी येथे उपोषण करण्याचा इशारा दिला आहे. याचे निवेदन आदिवासी विकास मंत्री,पोलीस अधिक्षक नंदुरबार,तहसीलदार अक्कलकुवा यांना देण्यात आले आहे.
घटनास्थळावरील परिस्थितीनुसार भिमसिंग तडवीचा हा अपघाती मृत्यू नसून घातपात असल्याचे निवेदनात नमूद केले आहे. दुचाकीच्या नुकसानीच्या तुलनेत दुचाकी व मृतदेह रस्त्यापासून खूप लांब फेकले गेले असते परंतु दुचाकी व मृतदेह रस्त्यावरच पढून राहिल्याने आमच्या संशयात भर पडली होती, असेही निवेदनात म्हटले आहे. निवेदनावर गोरजी ओल्या तडवी (मयताचे वडील), राजेंद्र गोरजी तडवी, (मयताचा भाऊ), कालुसिंग तडवी, भिका दामजा वसावे (मामा) व काकड्या जुन्या वसावे यांच्या सह्या आहेत.
