नंदुरबार l प्रतिनिधी
नागपूर येथील झिरो माईलची जागा मच्छीमार भोई समाजास मिळावी, अशी मागणी नंदुरबार जिल्हा भोई समाज सेवा मंडळातर्फे करण्यात आली आहे. तसे निवेदन निवासी उपजिल्हाधिकारी सुधीर खांदे यांना देण्यात आले.
निवेदनात पुढे म्हटले आहे की, नागपूर शहरातील झिरो माईल परिसरात विदर्भ विभागीय मच्छीमार संघाने शासनाने जागेची ठरविलेली किंमत रु.२९,७१५/- रक्कमेने भूमी अभिलेख कार्यालयात दि.११ नोव्हेंबर १९७४ रोजी भरुन बांधकाम मंजुरीने इमारत बांधली होती. पण हेरीटेज वॉक आणि मेट्रोसाठी सदरची जागा आवश्यक आहे, या निमित्ताने तत्कालिन जिल्हाधिकारी मार्फत दि.२७ डिसेंबर २०१७ रोजी प्रशासनाने ताब्यात घेतली आणि जागेवरील इमारत जमीनदोस्त केली. विशेष म्हणजे दरम्यानच्या काळात मे.उच्च न्यायालयाने ८५५४ चौ.फुट जागा सोडून उर्वरित जमीन प्रशासनाने विकास कार्यासाठी घ्यावी, असा आदेश दिला असतांना देखील प्रशासनाने इमारत जमीनदोस्त केली. उल्लेखित जागा महानगरातील महत्त्वाच्या स्थळी आहे म्हणून या संदर्भात अनेकांची मागणी आहे.
तसेच सर्व अभ्यासाअंती उच्च न्यायालयाने हेरीटेज वॉक प्रकल्पच रद्द केला आहे. मात्र तिकडे इमारत या निर्णयापूर्वीच तोडली गेल्याने मच्छीमार भोई समाजावर अन्याय झाला आहे. म्हणून सदरची जागा पूर्ववत विदर्भ मच्छीमार भोई समाजास, त्या जागेवर ज्या संस्थेचा हक्क आणि अधिकार आहे, अशा संस्थेस देण्यात यावी, असे निवेदनात म्हटले आहे, निवेदन देतेप्रसंगी नंदुरबार जिल्हा भोई समाज सेवा मंडळाचे प्रभारी अध्यक्ष चंद्रकांत खेडकर, उपाध्यक्ष इंजि.रामकृष्ण मोरे, सदस्य ऍड.प्रकाश भोई, डॉ.गणेश ढोले, राजेंद्र भोई, संजय साठे, जितेंद्र खेडकर, सुरेश वाडीले, प्रताप सोनवणे आदी उपस्थित होते.