नंदुरबार | प्रतिनिधी
छडवेल कोर्डे ता.साक्री येथील सुजलॉन कंपनीच्या प्लांटमध्ये काल दुपारी कामगाराच्या गुदद्वाराला एअर ब्लोअर मशिनचा पाईप लावल्याने तरुणाच्या शरीरात हवेचा प्रचंड दाब जावून त्याच्या आतडया व किडनीला प्रचंड प्रमाणात इजा पोहचली आहे. या अत्यवस्थ तरुणाला सुरुवातीला शहरातील निम्स हॉस्पीटलला उपचारार्थ दाखल करण्यात आले होते. मात्र, नंतर सुरतला हलविण्यात आल्याचे समजते.
याबाबत अधिक माहिती अशी की, छडवेल कोर्डे ता.साक्री येथे गेल्या अनेक वर्षांपासून सुजलॉन पवन उर्जा प्रकल्प उभारण्यात आला आहे. याठिकाणी असलेल्या प्लांटमध्ये अनेक कर्मचारी व कामगार कामाला आहेत. प्लांटमध्ये काम करतांना अंगावर व कपडयांवर कारखान्याच्या विविध पार्टचे कण उडत असल्याने ते स्वच्छ करण्यासाठी एअर ब्लोअर मशिन ठेवण्यात आले आहेत. या मशिनवरुन सर्व कामगार अंगावर हवेचा दाब देवून अंगावरील व कपडयांवरील कण स्वच्छ करत असतात.
काल दि.९ डिसेंबर रोजी दुपारी १२ वाजेच्या सुमारास छडवेल कोर्ड येथील एक २० वर्षाचा कंत्राटी काम करणारा तरुण आपले काम आटोपून या एअर ब्लोअर मशिनजवळ आला. त्याने अंगावर हवेचा दाब देवून साफ केले. मात्र, त्याचवेळी तेथे उपस्थित असलेल्या दोघा कामगार तरुणांनी सदर मशिन त्या तरुणाच्या गुदद्वाराला लावले व हवेचा दाब वाढवला. त्यावेळी हवेचा प्रचंड दाब असल्याने सदर तरुणाच्या शरीरात हवा जावू आतडे फुगून मोठया प्रमाणावर इजा झाली आहे. तसेच किडणीलाही मोठया प्रमाणावर दुखापत झाली आहे. त्यामुळे या तरुणाला सुजलॉन कंपनीच्या वैद्यकीय पथकाने शहरातील निम्स हॉस्पीटलमध्ये उपचारार्थ दाखल केले आहे.
मात्र, त्या तरुणाची प्रकृती चिंताजनक असल्याने त्याला पुढील उपचारासाठी सुरतला हलविण्यत आल्याचे समजते. घटना घडताच दोघे तरुण फरार झाल्याचे सांगण्यात येत आहे.
दरम्यान, पाच ते सहा वर्षापुर्वी अशाचप्रकारची घटना घडली होती. परंतू त्यावेळी हवेचा दाब कमी असल्याने संबंधीत कर्मचार्याला कमी प्रमाणावर इजा झाली होती. मात्र, काल घडलेल्या या प्रकारामुळे सुजलॉन कंपनीत सुरु असलेला भोंगळ कारभार चव्हाटयावर येवू लागला आहे. याबाबत सुरुवातीला निजामपूर पोलीस ठाण्यात गुन्हा दाखल करण्यात आल्याचे व तेथून शून्य क्रमांकाने नंदुरबार शहर पोलीस ठाण्यात वर्ग करण्यात आल्याचे समजते.
