म्हसावद l प्रतिनिधी
शहादा तालुक्यातील कुऱ्हावद त.सा. येथे आंतरराष्ट्रीय भ्रष्टाचार विरोधी दिन साजरा झाला. त्यात भ्रष्टाचार ही सर्वात जटिल सामाजिक, राजकीय आणि आर्थिक घटनांपैकी एक आहे, ज्याने जगातील सर्व देशांना प्रभावित केले आहे. भ्रष्टाचाराविरुद्ध जनजागृती करण्यासाठी दरवर्षी ९ डिसेंबर रोजी आंतरराष्ट्रीय भ्रष्टाचार विरोधी दिन (International Anti Corruption Day) साजरा करण्यात येतो.
भ्रष्टाचार समाजातील खुपच गंभीर समस्या आहे. ही समस्या पुर्ण समाजाला पोकळ करीत आहे. प्रत्येक क्षेत्र कमी-जास्त प्रमाणात भ्रष्टाचारामध्ये गुंतल्याचे आढळून येते आहे. आजकाल आपण वर्तमानपत्रे, सोशल मिडीया व इतर मार्गाने भ्रष्टाचारबद्दल नवनवीन घोटाळे ऐकतो, वाचतो. भ्रष्टाचार हे गुणवत्तापुर्ण शिक्षण, संस्कार, कायदा, प्रामाणिकपणा, नितीनियम, कर्तव्य, निस्वार्थ सेवाभाव, अशा गोष्टींना संपवित आहे.भ्रष्टाचाराला आव्हान देणे हे तरुणांचे कर्तव्य आहे. आजच भ्रष्टाचाराच्या विरोधात कार्य करा. भ्रष्टाचार रोखता येतो, देशाचा विकास दर आहे ना वाढवायचा तर भ्रष्टाचाराला मुळातून मिटवूया. देश पुढे नेऊया. थांबवा भ्रष्टाचार नका होऊ त्यात सहभागी हाच सल्ला आहे सर्वांचा.
या सर्व गोष्टी विचारात घेता, के व्ही पटेल कृषी महाविद्यालयाच्या भिष्मानंद जाधव, हर्षल बैसाणे, मयूर पाटील, स्वप्निल पाटील, भावेश पटेल, ऋषिकेष बागले या कृषिदूत कुऱ्हावद या गावात ग्रामीण कृषि कार्य अनुभव या कार्यक्रमा अंतर्गत जागतिक भ्रष्टाचार विरोधी दिवसा निम्मित शेतकऱ्यांशी संवाद साधला त्यामध्ये त्यांनी भ्रष्टाचाराचे तोटे व त्याचा समाजावर होणारा परिणाम या बद्दल लोकांना मार्गदर्शन केले. आपल्यावर होणारा भ्रष्टाचार कसा थांबवावा व त्या संदर्भातील नियम व कायदा स्थानिक लोकांना सांगितले तसेच भ्रष्टाचाराच्या नियंत्रणाकरीता काही उपाय योजना सांगितल्या या प्रसंगी गावातील सरपंच भिमसिंग मोरे, पोलीस पाटील रेखाबाई कूवर, उपसरपंच फुलू तुकाराम चव्हाण, भरत दगडु पाटील, गोविंद श्याम पाटील,काशिनाथ बधू पाटील व इतर ग्रामस्थ उपस्थित होते.
