नंदुरबार | प्रतिनिधी
सकल जैन समाजातर्फे अल्पसंख्याक कमेटीत प्रतिनिधीत्व मिळावे या मागणी करिता जैन समाजातर्फे आदिवासी विकास मंत्री तथा जिल्ह्याचे पालकमंत्री डॉ. विजयकुमार गावित यांना निवेदन देण्यात आले.
सकल जैन समाजामार्फत देण्यात आलेल्या निवेदनात म्हटले आहे की, आपल्या प्रयत्नामुळे २५.२.२००४ ला जैन समाजाला अल्पसंख्यांक दर्जा मिळाला. त्यानंतर केंद्र शासनाने केंद्रीय स्तरावर जैन समाजाला अल्पसंख्यांक दर्जा दिल्याचे घोषीत केले. आपण जैन समाजासाठी केलेल्या प्रयत्नाची आम्हाला जाण आहे.
महाराष्ट्र शासनाने जिल्हास्तरावर जिल्हाधिकारी साहेबांचा अध्यक्षतेखाली अल्पसंख्याक कल्याण- कमेटी केलेली आहे. परंतु त्या कमेटीत जैन समाजाला प्रतिनिधीत्व नाही. एका विशेष समाजाचे त्या कमेटीवर अधीपत्य आहे. वास्तवीक पाहता सर्व अल्पसंख्यांक समाजाला त्या कमेटीत प्रतिनिधित्व दिले गेले पाहीजे. जैन समाजाचे कमीत कमी २ प्रतिनिधी महाराष्ट्रातील प्रत्येक जिल्ह्याच्या कमेटीत समाविष्ट करण्यासाठी शासनस्तरावरुन योग्य ती कार्यवाही करावी.
तसेच अल्पसंख्यांकच्या कल्याणासाठी शासनाकडून निधी पाठवीला जातो, त्यात देखील योग्य तो भाग जैन सामाजाला मिळावा अशी मागणी निवेदनाव्दारे करण्यात आली आहे. यावेळी निवेदनावर सकल जैन समाजाचे सुरेश जैन, विरल कुवाडिया, पदम पाटोदी, मदनलाल जैन ,प्रकाश कोचर, जेठमल अंबानी यांच्या सह्या आहेत.
