नंदुरबार l प्रतिनिधी
अक्कलकुवा तालुक्यातील काठी येथे आठशे वर्ष जुनी दसरा पूजनाची परंपरा असून याठिकाणी घोड्यांची शर्यत आकर्षण ठरली,यावलेली हजारो भाविकांच्या उपस्थितीत दसरा सण उत्साहात साजरा करण्यात आला.
-सातपुड्यातील अक्कलकुवा तालुक्यातील काठी संस्थांनच्या राज घराण्याकडून १२४६ सालापासून दसरा उत्सव साजरा करण्याची परंपरा ८०० वर्षानंतर आजही काठी संस्थान राजघराणे व नागरिकां द्वारे सुरू आहे.
सातपुडा पर्वतरांगांमध्ये दळणवळणाची सोय नसल्याने राजा महाराजांच्या काळात घोड्याला मोठे महत्त्व होते. दसरा सणा निमित्त घोड्याचे पूजन करण्याची मोठी परंपरा होती. विशेषता म्हणजे दसऱ्यानिमित्त घोड्याची पूजा झाल्यानंतर परिसरात घोड्यांची शर्यत लावली जाते. आजही ही परंपरा टिकून आहे. काठी संस्थानातील नवाय खांब पूजन झाल्यानंतर राजघराण्यातील राजांच्या राजगादीची पूजा केली जाते त्यानंतर घोड्यांच्या शर्यतीची रेस लावली जाते.
यंदा दसरा उत्सवानिमित्त पुजारी बाबांद्वारे नवाय खांब येथे पूजा व घोड्यांची पूजा करून राजघराण्यातील अठरावी पिढीतील सदस्य पृथ्वी सिंग दादा पाडवी यांच्या उपस्थितीत राजगादीच्या पूजनानंतर घोड्यांच्या शर्यतीचा नारळ फुटल्यानंतर शर्यतीला खरी सुरुवात झाली. घोड्यांच्या शर्यतीमध्ये यंदा गुजरात, मध्यप्रदेश व महाराष्ट्रातील जवळपास ८८ घोडेस्वारांनी सहभाग नोंदवला होता.
काठी संस्थांनचा दसरा पूजन व घोड्यांची शर्यत पाहण्यासाठी सातपुड्यासह गुजरात मध्य प्रदेश व महाराष्ट्रातील हजारो भाविक उपस्थित होते. सलग दुसऱ्या दिवशी घोड्यांची शर्यत पार पडल्यानंतर गरबा नृत्य कलाकार व विजेत्या घोडेस्वारांना बक्षीस वितरणाचा कार्यक्रम राहणार आहे. अशी माहिती आयोजकांनी दिली आहे.
