अक्कलकुवा l
भांगरापाणी येथील शासकीय माध्यमिक व उच्च माध्यमिक आश्रमशाळेत एकात्मिक आदिवासी विकास प्रकल्प अंतर्गत गट स्तरीय क्रिडा स्पर्धा संपन्न झाल्या.
अक्कलकुवा तालुक्यातील शासकीय व अनुदानित वीस आश्रमशाळेच्या सातशेहुन अधिक विद्यार्थ्यांनी सांघिक व वैयक्तीक क्रिडा प्रकारात सहभाग नोंदवला होता. २० व २१ सप्टेंबर रोजी मुलांच्या तर २२ व २३ सप्टेंबर रोजी मुलींच्या क्रिडा स्पर्धा आयोजित करण्यात आल्या. या गट स्तरीय क्रिडा स्पर्धाचे उद्घाटन एकात्मिक आदिवासी विकास प्रकल्प कार्यालयाचे प्रकल्प अधिकारी तथा सहाय्यक जिल्हाधिकारी डॉ.मैनक घोष यांच्या हस्ते करण्यात आले होते .
चार दिवस चाललेल्या गट स्तरीय क्रिडा स्पर्धात चौदा, सतरा व एकोणविस असे तीन गट तयार करून सांघिक खेळात कबड्डी, खो-खो, व्हॉलीबॉल, हॅन्डबॉल व रिले तर वैयक्तिक खेळ प्रकारात थाळीफेक, गोळाफेक, भालाफेक, लांबऊडी, उंचऊडी, धावणे, चालणे अशा स्पर्धांचा समावेश होता.समारोप एकात्मिक आदिवासी विकास प्रकल्प कार्यालय तळोदा येथील शिक्षण विस्तार अधिकारी बी.आर.मुगळे यांच्या अध्यक्षतेखाली करण्यात आले. या प्रसंगी भांगरापाणी शाळेचे मुख्याध्यापक एम. एन. तडवी यांनी सर्व शाळेच्या मुख्याध्यापकांचा व क्रिडा शिक्षकांचा शाल,पुष्पगुच्छ व श्रीफळ देऊन सत्कार केला.
बी.आर.मुगळे, शिक्षण विस्तार अधिकारी यांनी आपल्या भाषणातून विद्यार्थ्यांना खेळाचे महत्व पटवून दिले. व अभ्यासा बरोबर मैदानी खेळ किती महत्वाचे आहेत याची विद्यार्थ्यांना जाणिव करुन दिली . तसेच या क्रिडा स्पर्धेच्या समारोपा प्रसंगी व्यासपीठावर
के.आर.पाडवी (आदिवासी विकास निरीक्षक,तळोदा), भांगरापाणीचे पोलीस पाटील विनोद वसावे ,.जे.टि.वळवी, के.पी.अलकारी,ए. बी. नगराळे ,
एस.सी.जगदाळे , बी.के.महिरे , ए.बी.चव्हाण, एस.एस.राठोड, व्ही.व्ही. नाईक , एम. बी. गिरासे उपस्थित होते.
या क्रिडा स्पर्धा यशस्वी करण्यासाठी विविध समित्यातील अध्यक्ष, सदस्य तसेच सर्व शिक्षक , प्रमुख पंच, पंच, सहाय्यक पंच, गुण लेखक, टाइम किपर सर्व सहभागी शाळेचे क्रिडा शिक्षक, चतुर्थ श्रेणी कर्मचारी, भांगरापाणी शाळेचे स्वयंसेवक यांनी परिश्रम घेतले. या कार्यक्रमाचे सूत्रसंचालन एस.एस.अलकारी यांनी केले तर प्रास्ताविक संजय अहिरे यांनी मांडले व आभार शाळेचे मुख्याध्यापक एम. एन. तडवी यांनी मानले.
