धडगाव l प्रतिनिधी
तालुक्यातील सोन खुर्द गावातील जरीपाडा येथे सिकलसेल आजाराने पिडीत महिलेला मारहाण केल्याप्रकरणी पोलिस उपनिरीक्षकास एका कर्मचाऱ्याविरोधात धडगाव पोलिस ठाण्यात गुन्हा दाखल करण्यात आला आहे.
तीन दिवस पिडीत महिलेसह तिच्या नातेवाईकांनी पोलिस ठाण्यात ठाण मांडल्यानंतर गुन्हा दाखल झाला आहे. असे असले तरी पिडीत कुटूंबाकडून मात्र संबंधित पोलिसांवर अनुसूचित जमाती अत्याचार प्रतिबंधक कायद्यान्वये गुन्हा दाखल करण्याची मागणी करण्यात येत आहे.
याबाबत पोलिस सूत्रांनी दिलेल्या माहितीनूसार, धडगाव तालुक्यातील सोन खुर्द गावातील जरीपाडा येथे दारु विक्रीच्या संशयावरुन पतीला अटक करण्यासाठी पोलिस कर्मचारी गेले होते. यावेळी पती बाहेरगावी गेले असल्याने महिला घरात एकटी होती. सदर महिलेला तिच्या पतीबद्दल विचारणा करत पोलिस अधिकारी व कर्मचाऱ्यांनी मारहाण केल्याचे महिलेने दिलेल्या फिर्यादीत म्हटले आहे.
यावेळी संबंधित पिडीत महिला छाया राजेश पटले (वय २८) हिने मी सिकलसेलग्रस्त असून मला मारहाण करु नका, अशी विनवणी पोलिसांना केली. यावेळी मारहाण करणारे पोलिस उपनिरीक्षक राहूल भदाणे व पोलिस कर्मचारी पिंपरे यांना सोबतच्या पोलिसांनीही समज दिली.
त्यानंतर त्यांनी मारहाण करणे थांबविले. सोबत महिला पोलिस कर्मचारी असतांना पोलिस उपनिरीक्षक व पोलिस कर्मचाऱ्याने मारहाण केल्याने संबंधितांवर गुन्हा दाखल व्हावा, अशी मागणी पिडीत महिला व तिच्या कुटूंबियांच्यावतीने करण्यात आली होती.
सलग तीन दिवस पोलिस ठाण्यात ठाण मांडल्यानंतर संबंधित पोलिस उपनिरीक्षक राहूल भदाणे व पोलिस कर्मचारी पिंपरे यांच्यावर धडगाव पोलिस ठाण्यात भादंवि कलम ३२३, ५०४, ३४ प्रमाणे गुन्हा दाखल करण्यात आला आहे.
